「提倡健康老齡化，為銀髮族建立良好生活品質」議案

主席，今屆立法會曾多次辯論同長者生活與健康相關嘅議題，包括我去年中動議嘅「加快實踐『健康城市』目標」議案。我當時指出，政府要喺醫，係「醫療」個「醫」，仲有食、住、行等多方面作出配合，協助香港應對老齡化嘅挑戰，讓所有年齡層嘅市民都生活得健康、安心，又開心。

過去一年半時間，我好高興睇到，政府喺實踐健康城市同推動長者健康方面係有做嘢嘅，有聽意見嘅。喺醫方面，政府制訂咗《基層醫療健康藍圖》，將「治未病」同「病向淺中醫」嘅概念政策化、主流化。政府亦加強咗公營嘅中醫服務同中西醫嘅協作，呢方面香港起步比較遲，嚟緊要加把勁追落後。

喺住方面，今年施政報告採納咗我多年前提出嘅建議，將同時適用於長者、殘疾人士、同健全人士嘅通用及通達設計，納入屋宇署嘅樓宇設計手冊，使到更多樓宇適合居家安老。

居家安老近年大家講得好多，但長幼共融就似乎忽略咗。如果可以喺城市規劃、舊區重建、樓宇設計、政策支援，以及公眾教育等多個方面，促使更多年輕人同佢哋嘅年長父母一齊生活或者就近居住，容易互相照顧，對整體社會將會帶來好大益處。

喺行方面，除咗樓宇設計要便利長者生活，喺出行方面，道路、休憩空間、各種交通工具同公共設施嘅設計，以至整個城市嘅規劃布局，亦係不能忽略。運輸署依家做緊《交通運輸策略性研究》，我提醒署方要特別考慮長者嘅出行需要，因為當有關運輸策略將來實施嘅時候，估計每三個香港人就一位係長者。

此外，我亦提議可以善用樂齡科技，促進落實居家安老同長幼共融。有關科技同設備，未來將會愈做愈好，愈做愈平，當局應注視相關發展，適時引入同考慮資助長者購買。

喺食方面，我覺得政府係做得最少同最唔重視嘅。香港唔少長者其實都好注重飲食健康，但往往係因為佢哋已經患上咗一啲長期病患，例如糖尿病、高血壓同呼吸問題，呢啲疾病都同佢哋年輕時嘅飲食習慣係息息相關。但現行食物政策主要只係關注安唔安全，對於係咪食得健康，例如太甜、太咸、太辣、太燶、太濃、太快、太飽等，政府亦應加以關注。

最後，部分人慣性覺得長者多咗對社會係負累，會導致消費同經濟收縮。其實香港好多長者都係好健康，好有活力，可以繼續為經濟發展作出貢獻，有能力參與不同嘅工作，同年青人分享經驗，避免同減少重犯佢哋嘅錯。希望政府新成立嘅「銀髮經濟顧問小組」，除咗關注經濟同消費，亦應顧及點樣發揮長者嘅潛力，令佢哋活得更開心，更健康。本人謹此陳詞，支持原議案及各項修正案。