「改革公務員制度 提升政府效能」議案

主席，國家主席習近平強調為官者要「勇於擔當、善於作為」；候任特首李家超強調政府施政要「以結果為目標」；要做到呢幾點，單靠完善選舉制度並唔足夠，仲必須有同樣愛國愛港、高質高效嘅公務員隊伍配合。

我代表嘅建測規園界別，有唔少選民係公務員，去年我嘅競選對手亦係退休公務員，其實我都係做公務員出身，不過熟悉我嘅人都知道，我向來都係是其是、非其非，對公務員制度出現嘅問題，對個別公務員嘅態度、表現等，都係有話直說。

去年我喺立法會提出嘅質詢，有兩條係有關公務員嘅表現管理制度，政府嘅答覆令我震驚，揭露咗喺過去5年，接近19萬名公務員當中，原來只有幾個人，係因為表現持續欠佳而被勒令退休。因為表現欠佳，而被暫停或延遲發放增薪嘅公務員，平均每年亦只得十數個。呢個絕對唔係市民心目中，表現差劣嘅公務員嘅比例。

我知道有好多公務員都係有心、有能力、有承擔、敢作為嘅，但現行嘅制度同文化，往往令佢哋愈做愈辛苦，但遲遲睇唔到努力嘅成果。部分人因而意興闌珊，變成「hea住做」。部分人就選擇離開政府，希望喺私人市場闖一番新事業。造成公務員體系出現「近墨者黑」、「劣幣驅逐良幣」嘅現象，績效逐步下降，市民嘅不滿程度不斷上升。

其中一種最常見嘅官僚文化，就係我喺修正案提出嘅「按本子辦事」。業界嘅發展審批申請，官員跟足程序做。程序建議30日內回覆，往往就最後1日先覆，而且唔少係冇實質嘅回覆。最後信來信往，拖足幾年，得唔到任何進展，但相關處事官員就可以話：「我已經跟足程序做咗，服務承諾達標！」

業界有啲新設計、好建議，負責審批嘅公務員話：「未見過喎、冇指引喎、唔啱程序喎」，冇人夠擔拍板，唯有轉過彎、善意咁樣提醒你，不如用番啲舊嘢算喇。以前擔心官員太多酌情權，會滋生貪腐問題，依家啲官員就往往有權而不用，因為做得好未必有人讚你，做得唔好就要孭鑊，而且不論表現好壞，都係劃一水平加薪。最後變成原議案所講，少做少錯，唔做唔錯，咁樣香港又點會進步呢？

多項修正案提到要推動跨部門、跨職系嘅升遷選拔，做到良才善用，能者居之，有關做法我早幾年前就提出。政府近年開設嘅部分首長級職位，喺職能上並冇獨特嘅要求，但係就往往限制只能由某一、兩個職系嘅公務員出任，其他職系同專業嘅人員，即使能力可能最高，但因為唔符合相關職系嘅要求，連申請嘅資格都冇。

去年施政報告宣布，會根據「能者居之」原則，檢視公務員高層職位嘅選拔聘任制度，但大半年過去，只有幾個職位會咁做，雷聲大，兩點小，希望新一屆政府加快、擴大有關檢討同改革。

主席，本人謹此陳詞。