「改革招標制度 扶助本地企業」議案主體發言

主席，第六屆行政長官選舉當選人李家超先生，提出來屆政府施政要有4個「提」字，包括「提升香港競爭力」，以及喺覓地建屋「提速、提效、提量」。但如果缺乏足夠同優質嘅專業人才、佔本地企業數目多達9成嘅中小企發展萎縮，又點樣可以提升香港競爭力呢？

如果香港嘅建造業界，包括我代表嘅建築、測量、都市規劃及園境界，出現嚴重嘅人才流失，業界內嘅專業顧問公司愈做愈耷，又點樣能夠高速、高效、同妥善咁落實香港未來各項發展及建屋計劃呢？

呢啲都係我哋面對嘅問題，呢個就係我提出今次「改革招標制度 扶助本地企業」議案嘅原因，唔係純粹為咗業界嘅利益，而係希望加快解決香港嘅土地房屋問題，提升香港整體競爭力，繼而為大灣區同國家作出更大嘅貢獻！

主席，為咗保障公帑運用，政府嘅招標及採購制度，以價錢高低作為考慮因素，原則上係合情合理嘅。但如果「價低者得」演變成「割喉式入標」，出現業界稱為「Fee Diving」嘅現象，令中標價喺惡性競爭之下，低到不合理、不尋常嘅水平，英文叫做「Absolutely Low Bids」，就可能會影響產品同服務質素。

喺建造工程嚟講，「不尋常嘅低標價」，往往會導致工程延誤、爛尾、出現安全同質量問題，或者係出現中標價以外嘅索償同追加開支，最後令「低標價」變成「高標價」，甚至變為超支。

喺去年第三及第四季，政府批出嘅主要工務工程合約，最少有10個項目嘅中標價，只佔原來核准預算嘅5成至6成。估計極有可能係受到近年嘅立法會拉布、黑暴、疫情同經濟不景影響，業界為咗有項目開工，吊住鹽水，將入標價愈壓愈低。

有關情況表面上幫庫房慳番唔少錢，但中標者會唔會因為價錢過低而「將貨就價」，令到工程質素下降、進度延誤，以至出現安全同質量嘅問題呢？承建商會否以種種辦法，喺原定中標價之外，向政府申請種種額外費用同索償，最終令納稅人得不償失。呢啲我相信都係經常遇到問題。

至於與建設相關嘅專業顧問服務，包括建築及園境設計、土地及工料測量、項目管理同監工等等，相關嘅顧問費用，一般係只佔整項工程造價嘅幾個百分點，但係對於維持項目嘅設計、質素、進度同成本控制等等，就係相當重要。

專業顧問服務嘅標價不合理地低，同樣會出現「將貨就價」同「將人就價」嘅問題，委派數量不足、或資歷同經驗較淺嘅專業人員負責項目嘅工作，影響設計同監管質素，增加將來需要中途更改設計，以及出現延誤、超支同質量問題嘅風險。

顧問公司「將人就價」，亦導致業界普遍出現工時過長，收入與工作量不成正比嘅問題，部分年輕業界因而轉行，導致人才流失，危害整個行業嘅生態同專業發展。

政府方面，鑒於部分項目近年出現延誤同埋超支，相關部門傾向不斷增加人手，以加強監管，導致公務員編制膨脹。而政府高薪「搶人」，亦令到私人企業更難聘請同留住優質嘅員工，形成惡性循環。

為咗加強監管，政府近年又不斷增加審批程序同指引，喺招標文件同合約條款「加辣」，業界要虛耗更多時間同人手，嚟應對一啲唔合理嘅要求，同不必要嘅行政、文書工作。最終令到工時變得更長，專業發揮嘅空間收窄，形成另一個惡性循環，難以做到提速、提效、提量。

此外，官員為咗保障自己，往往將合約內容全面傾向政府方面，要求中標者承擔項目可能出現嘅所有責任同風險。當政府嘅建築顧問合約，出現一啲事前無法預計，並且與顧問公司嘅表現無關嘅延誤，例如係大幅度嘅更改設計、立法會延長審批、仲有疫情、示威同惡劣天氣等，令原定嘅合約時限大幅延長，工作量大大增加。與工程承建商唔同，現時政府合約並冇機制或條款，容許顧問公司就有關情況向政府索償或增加服務費，令業界感到非常之唔公平，亦都唔合理。

主席，過去幾年政府已因應我同業界嘅意見，嘗試優化招標制度，降低「價低者得」嘅比重，包括引入同時考慮投標者嘅技術同經驗水平嘅「雙信封制度」，多次調整「價格信封」嘅評分準則同比重等等，對此我係表示感謝同歡迎。但「雙信封制度」，並未為本地中小型及初創企業創造更多機遇，反而某程度加強咗大型同跨國公司嘅競爭力。

除咗「價低者得」，政府嘅招標制度仲存在其他問題：其中一個係「綑綁式招標」，不必要地將多個較少嘅項目，綑綁成單一合約招標，令中小企無法參與，咁當然政府喺管理方面就容易好多。

其二係「電子化遲緩」，政府要求建造業界應用種種創新科技，包括MiC、BIM等，但政府自己嘅招標、審批、監察同付款程序等，卻遲遲未有電子化，令業界同時要應付電子同實體紙本兩套嘅要求，費時失事，增加工作量同營運成本。

故此，我促請特區政府，尤其係仲有個多月就上任嘅新一屆政府，檢討及改革政府嘅招標採購制度，為各類招標項目制訂「最低合理費用」，以杜絕「割喉式入標」。另外亦要引入「本地優先」嘅元素、更加着重創意同創新、避免「綑綁式招標」、制訂「延期顧問工作/Prolongation」嘅補償機制、加快將各個相關政府程序電子化，以及一啲廢除不合理、不對等同不合時宜嘅合約條款。

本人謹此陳詞，懇請各位議員支持我嘅議案。