「活化強制性公積金」議案

主席，大部分市民，包括我本人，都對強積金制度都係有所不滿嘅，覺得佢收費高、透明度低、回報率欠佳。早前股市回落，新聞又報道每名打工仔嘅強積金戶口，又蝕咗唔少，真係聽到都心翕。

不過我哋G19嘅同事，代表保險界嘅陳健波議員，成日都話我哋有誤解，強調強積金嘅平均回報率係跑贏通脹，蝕錢嘅基金只係少數，回報差主要係有部分供款人唔識揀，同懶得做好管理。但事實上，就係有唔少打工仔唔識揀、亦唔會花時間去管理。佢哋認為，既然畀咗錢交託畀基金經理管理，管得唔好，蝕咗錢，點解冇人需要負責，補償番佢哋嘅損失呢？

政府同積金局表示，近年已推出大量嘅措施，去降低強積金嘅行政費同管理費，增加透明度同供款人嘅選擇。隨住「積金易」平台推出，打工仔將可以更方便、快捷同便宜咁管理佢哋嘅強積金投資。不過有關平台最快2025年先係推出，由2000年強積金制度實施起計，已過咗四分一個世紀，一般打工仔嘅職業生涯，又有幾多個25年呢？

講番何君堯議員嘅議案，佢建議政府活化強積金計劃，畀打工仔提早提取強積金用作購買醫療保險，以加強佢哋嘅健康保障，同紓緩公營醫療系統嘅壓力，原意係好嘅。但香港嘅醫療體系存在好多問題，包括公私營失衡嚴重，導致公家服務輪候時間過長，公營醫療開支瀕臨爆煲。但容許市民動用強積金嚟購買醫保，又係咪有效嘅解決辦法呢？

同其他供求失衡問題一樣，要有效解決香港嘅公私營醫療失衡，首要係增加供應，要多管齊下增加醫護人手，包括培訓本地人才、輸入境外人才、吸引回流，以及將中醫藥治療主流化、公營化。另一方面要致力加強基層醫療及保健服務，防止市民小病變大病，少啲需要入醫院；要切實推動健康城市建設，鼓勵市民注意飲食，多做運動，定期體檢，治於未病。用強積金去購買醫保，就算係可行，對香港嘅醫療問題都未能治本。

此外，醫療費用只係眾多退休生活開支嘅一種。住屋係另一種主要支出。之前有議員提議活化強積金幫人買樓，我當時都係反對嘅，因為同樣係解決唔到供求問題。對部分退休長者嚟講，佢哋會覺得安老院宿位畀醫院床位更重要，前者同樣係嚴重供求失衡，而宿位開支，醫保一般都係唔包嘅。

所以，剩係容許提取強積金用嚟購買醫保，並唔全面，但如果乜嘢用途都可以攞得，基層市民嘅強積金可能好快就會用晒，到真正退休時候，可能又要靠仔女、靠政府去供養，失去咗強積金作為退休保障其中一環嘅原意，因此我唔支持有關議案。主席，本人謹此陳詞。