[:zh]「發展香港成為區域專業服務中心」議案[:]

[:zh]主席，首先感謝盧偉國議員提出今日嘅議案，讓本會有機會討論將香港發展成區域專業服務中心嘅相關政策措施。正如原議案指出，國家「一帶一路」建設同「粵港澳大灣區」發展，為香港嘅專業服務業，包括我代表嘅建築、測量、都市規劃及園境界，帶嚟龐大嘅發展機遇。

早喺當選立法會議員之前，我就以測量師學會會長身份，成功爭取內地與香港嘅估價測量專業，落實成為首個專業資格嘅互認。但純粹取得內地相關專業資格，唔等於就可以喺不同省市執業同承辦建設項目。開咗大門，仲要開埋小門。

因此，我喺2018年聯同盧偉國議員，以全國政協身份去信國家住房和城鄉建設部，爭取畀港資建築及工程專業企業直接參與內地嘅建設項目。內地近年先後通過CEPA補充協議、《粵港澳大灣區發展規劃綱要》，以及前海、橫琴、南沙，以及整個大灣區推出嘅多項惠港措施同先行先試計劃，逐步放寬香港建築及工程企業同相關專業人士喺內地執業嘅限制。

今年1月1日起實施嘅《香港工程建設諮詢企業和專業人士在粵港澳大灣區內地城市開業執業試點管理辦法》，更為兩地專業服務業嘅企業資質互認開創先河。喺發展局轄下兩份建築及工程顧問公司名冊上嘅香港企業，經過簡單嘅登記備案程序，就可以直接喺大灣區九個內地城市提供專業服務。對此我再次向兩地政府，包括發展局表示感謝，並呼籲香港業界踴躍登記備案。

不過，對於一啲規模較細、成立年期較短，或者較少競投同參與香港政府工程及顧問項目嘅公司，例如係專門提供物業估價服務嘅產業測量企業，佢哋並唔喺該兩份名冊之內，甚至想入，都唔係咁容易入唔到，因而未能受惠於有關措施。

我喺修正案提出嘅第一項建議，就係完善兩地嘅專業資格及企業資質互認機制，將更多現時未獲內地認可嘅香港專業界別及企業納入互認範圍，希望特區政府會積極跟進。

修正案嘅第二項建議，係爭取更多內地建設項目開放予香港企業及專業人士參與。我喺前年聯同深圳前海管理局合辦嘅「前海‧香港青年建築設計比賽」，取得相當成功，得獎團隊可直接參與前海桂灣公園嘅地標建設項目。嚟緊我會爭取內地開放更多不同項目畀香港業界參與，希望特區政府亦會咁做。

最後係有關宣傳推廣工作，特區政府與內地嘅不同部門同省市，近年先後推出咗大量便利香港居民同企業到內地發展嘅措施，但唔少市民同業界都唔清楚細節同點樣申請。政府因此必須更積極、主動咁推廣宣傳，提供一站式嘅資訊平台及服務，好似我哋議員辦事處咁，教埋、幫埋佢哋申請。

時間所限，我唔再逐一講解修正案嘅其他建議，懇請各位議員支持原議案同我嘅修正案。[:]