[:zh]「積極把握國家『雙循環』新發展格局」議案[:]

[:zh]主席，我發言係支持廖長江議員提出嘅「積極把握國家『雙循環』新發展格局，振興疫後經濟」議案。

當美國前總統特朗普敗選，新任總統拜登上場，有人幻想美國嘅對華政策會有變。但現實係，拜登政府對中國同香港嘅無理打壓，比起佢上手似乎係有過之而無不及。因此，中央喺超過1年之前，就提出要構建以國內大循環為主體、國內國際雙循環相促進嘅新發展格局，絕對係有先見之明嘅主動作為同長期戰略，唔係純粹因應之前中美貿易戰，而作出嘅被動應對或權宜之計。

好開心見到，特首喺去年施政報告，已提出香港要把握「近水樓台先得月」嘅優勢，積極參與國內國際雙循環，更好融入國家發展大局。財政司司長亦喺今年嘅預算案，強調香港要把握世界經濟重心「西向東移」嘅大變局，發揮「一國兩制」優勢，善用祖國發展機遇。

主席，我係非常支持有關發展方向，因為內地市場大、發展快、為香港各界帶嚟龐大機遇。尤其喺美國打壓同疫情雙重打擊下，香港要加快復甦，唔靠自己國家，唔通靠美國？

不過，正如我喺尋日嘅「十四五規劃」議案中指出，空有政策同高層官員關注，如果負責執行嘅前線部門同公務員落實唔到、做得好慢，最後都係冇用。政府要積極、主動咁創造合適嘅客觀條件，推動不同階層、協助不同業界融入國家嘅雙循環發展，包括認識內地嘅政策、稅制、法規同營商環境，便利佢哋喺內地就業、創業及生活，以至一齊「走出去」。

例如「十四五」規劃綱要提出，要擴大內地與港澳嘅專業資格互認範圍，深入推進重點領域嘅規則銜接同機制對接。喺我同各界努力爭取下，內地當局今年一月起實施《暫行辦法》，容許合資格嘅香港建測規園界顧問公司及專業人士，通過簡單嘅登記備案程序，即能獲內地認可相關嘅專業資格同資質，直接喺大灣區開業同執業。但由於政府初期嘅宣傳不足，唔少業界都唔認識相關新政策、唔知點做登記，亦睇唔到登記咗之後可帶嚟乜嘢好處。

作為業界代表，我會繼續向內地當局，爭取更多便利及優惠措施，以及開放更多不同類型嘅建設項目，畀香港嘅顧問公司及專業人士參與，尤其一啲適合中小企同青年業界嘅項目。但係最重要嘅，都係業界自己亦要努力，積極參與國家嘅發展同建設。

「十四五」規劃亦強調，要便利港澳青年到大灣區內地城市就學、就業同創業。兩地政府近年推出咗多項政策措施及資助計劃，吸引香港青年人到大灣區發展，唔少本港及內地企業亦提供咗大量相關職位，但即使喺失業率高企之時，申請嘅人仍比預期少。多項調查都顯示，唔少香港青年仍舊係好抗拒、唔夠膽、或者唔知點樣先可以投身內地發展。

千里之行、始於足下；放眼神州、機遇處處。我呼籲香港嘅青年人，突破過往嘅思想同生活框框，積極認識同參與國家嘅發展，好好把握雙循環嘅機遇。本人僅此陳詞。[:]