「落實國家主席習近平發表『七一講話』，開啟良政善治新篇章」議案

國家主席習近平嘅「七一講話」，意義深遠、重大。第一重意義，係喺香港回歸祖國25周年，中央再一次、權威性咁，肯定咗「一國兩制」嘅成功實踐。正如習主席指出，一個咁好嘅制度，冇任何理由改變，必須長期堅持！

第二重嘅意義，係總結咗回歸25年來嘅經驗，提出「四個必須」，以確保「一國兩制」事業，朝着正確嘅方向行穩致遠。作為功能、專業界別嘅議員，我非常認同「必須保持香港嘅獨特地位和優勢」，並感謝習主席重申，中央會支持、鞏固香港嘅國際金融、航運、同貿易中心地位，維護自由、開放、同規範嘅營商環境。

習主席講話第三重意義，係對新一屆特區政府提出「四點希望」。我想集中講「共同維護和諧穩定」呢一點。

香港係全球最自由嘅城市之一，有着法治、包容、高效、拼摶等優點。來自世界各地嘅人，唔論種族、文化、信仰等，嚟到香港大部分都係求穩定、謀發展，堅信只要辛勤工作，就能夠改變自己同家人嘅生活。大家包容共濟、自強不息，攜手創造咗香港呢個奇蹟，並且為國家嘅改革開放作出重大嘅貢獻。

好可惜，有一少撮不良分子，喺外來勢力嘅支配下，事事政治化、兩極化，搞出甚麼「五區公投」、「違法佔中」，其後更變得暴力化，引發「旺角暴亂」、「黑暴風波」，嚴重咁破壞特區嘅法治同包容嘅環境，削弱香港嘅拼摶精神、發展效率、阻礙政府嘅有效施政，導致香港喺不少領域，都被一些內地及區內城市趕上、超越。

正如習主席指出，香港不能亂，也亂不起。家和萬事興，香港嘅發展不能再耽擱，我哋要同心合力，排除一切干擾，聚精會神咁謀發展。

主席，對唔同事件，有唔同意見係好正常嘅，但唔應該議而不決，更不應以違法嘅行為去阻撓、以暴力嘅手段去攬炒。正如習主席強調，只要大家真心擁護「一國兩制」嘅方針，熱愛香港呢個家園、遵守《基本法》同特區嘅法律，就可以成為建設香港嘅積極力量，可以為特區發展出一份力、作一份貢獻。

新任特首李家超日前指出，社會穩定係至為重要，沒有穩定，就冇發展。但我認為點樣喺穩中求進，同樣重要。過往部分嘅特區官員，就係只求穩，唔求進，令香港發展不進則退。

習主席要求改進政府嘅作風，樹立敢於擔當、善作善成嘅新風尚，強調要轉變治理嘅理念，把握好政府與市場嘅關係，把有為嘅政府同高效嘅市場更好結合起來。希望新班子與各級公務員，仲有我哋所有從政者、管治者，都能準確咁認識、貫徹落實習主席嘅講話，弘揚以愛國愛港為核心、同「一國兩制」嘅方針相適應嘅主流價值觀，繼續發揚求同存異、善拼敢贏嘅優良傳統，為香港市民共同創造更加美好嘅生活！

主席，本人謹此陳詞。