「鞏固香港區域物流樞紐地位」議案

主席，本人係發言支持由易志明議員提出嘅「鞏固香港區域物流樞紐地位」議案。我唔係物流業嘅專家，不過對於原議案提到要喺土地規劃方面，制訂有利香港物流業整體發展嘅長遠政策，想表達我嘅一啲睇法。

講到物流用地，唔少人都會諗到機場同貨櫃碼頭。其中香港嘅機場，喺廿幾年前已由啟德搬咗去赤蠟角，近年因應市場需求，新建咗第三條跑道、同埋航天城等項目，深信有利香港航空物流業同旅遊業進一步口嘅發展。

反觀香港嘅貨櫃碼頭，之前都諗過擴展，但興建10號貨櫃碼頭嘅計劃已經擱置咗好多年，原因之一係話冇咁大嘅需求。呢個可能係「雞同雞蛋」嘅問題，你唔夠地方用，冇新嘅碼頭設施，收費又高過其他地區，人哋自然就唔會揀香港喇，需求自然咪減少囉！結果香港嘅貨櫃吞吐量，慢慢就比其他地方追過，包括多個地方更加大、設施更加新、收費亦更加平嘅內地貨櫃碼頭。

近年有建議，將葵青貨櫃碼頭搬遷，例如搬去大嶼山、擬建嘅中部水域人工島、以至係屬於珠海範圍嘅桂山島，一方面促進香港嘅航運物流業嘅發展，一方面騰出現有嘅貨櫃碼頭用地，作房屋等其他用途。我同唔少業界都支持進行相關研究，政府有冇認真咁探討吓呢？

除咗機場同碼頭，物流業仲需要好多其他後勯用地，用作儲存、加工、包裝、擺放貨櫃同貨櫃車等。但政府又係冇做好規劃，冇提供足夠、合適嘅用地，業界唯有自行將新界嘅一啲農地、綠化帶等，合法或非法咁改作相關用途，呢啲亦係香港嘅棕地問題主要嘅由來之一。近年香港因為土地房屋短缺嚴重，政府計劃大量收回棕地作為建屋及其他用途，結果又影響到相關嘅棕地作業者，影響到香港嘅物流業。

另外係政府嘅短期租約政策，對物流業、甚至建造業發展都造成較大影響。根據現時政策，以短期租約租用政府嘅土地營運，往往只會獲批兩至三年嘅租約，之後每次續租，更可能只會續幾個月或一年。由於缺乏穩定性，導致相關企業唔敢作出較大額嘅投資，亦都未能與時並進，升級轉型，最後發展自然落後於人。

大家可以睇到，香港嘅空運同航運物流業發展，差距越嚟越大，同政府有冇做好相關嘅土地規劃同供應有莫大嘅關連。我希望政府可以汲取教訓，作出檢討，包括效法其他地區同我哋國家，積極咁運用土地規劃同批地嘅政策去促進產業發展，增強香港嘅發展動能。

當然，最重要嘅係要持續開發新嘅土地，例如擬建嘅中部水域人工島，但係唔應該只係用嚟起住宅，或者只係同支持金融、創科發展，應該容納更多元化嘅產業。本人謹此陳詞。