「全面認識國家發展，說好中國和中國香港故事」議案

主席，我多年已指出，政府嘅文宣解說工作好落後、好被動、效率低、成果差。當年嘅違法佔中，反對派肆意曲解《基本法》，將「八三一」決定妖魔化，將所謂「公民抗命」同埋「違法達義」美化，政府雖然唔可以話係打不還手，罵不還口，但係反駁歪理乏力，令正義難以充分彰顯。

唔單止政治議題係咁，對於唔少發展、基建項目，好似新界東北發展、沙中線工程、港珠澳大橋同高鐵工程等，政府都未能有效咁向市民說好當中嘅故事，講解可以帶嚟嘅好處，任由反對派歪曲抹黑，妖言惑眾，藉此打擊政府威信，阻撓香港嘅發展。

經歷過黑暴風波，以及美國為首嘅西方反華勢力，對我國嘅抹黑、打壓同圍堵，大家都已醒覺說好中國故事、說好香港故事嘅重要性、同必要性。之前唔少議員同事都已就呢方面發表意見，時間關係，我想集中講下說故事嘅平台。

講到特區政府說故事嘅平台，大家首先會想起香港電台。港台過往係有好多問題，但最近一兩年已有唔少改進，希望可以更快咁做得更好。另一個平台大家比較少提，就係政府新聞處，每年嘅開支係唔少嘅，呢年度差唔多用7億，但無論係市民大眾，以至我理解喺政府內部，有啲人、唔少人都話新聞處做得唔好，甚至話唔知佢哋每年用咁多錢，請咁多人，最後究竟係做咗啲乜嘢出嚟呢？

例如有人話，某部門想經新聞處出篇新聞稿，最少要預5、6個鐘，過程中要經成7、8個人審批，但最後批出街嘅中文，往往好多人都唔明講乜。有人讚新聞處同事影嘅相、拍嘅片、製作嘅專題報道，水平其實好高，但要預留一個禮拜、甚至更長時間畀佢哋做，乜嘢新聞都變咗舊聞。

另外我據聞，有啲問責官員要求新聞處可唔可以有啲新搞作，善用下新媒體，結果得到嘅回應係：「嗰啲我唔識，呢啲又唔係我工作範圍」，最後唯有自己喺個局裡面抽啲人去做，或者喺其他地方慳番啲錢，外判畀公關顧問幫手。如果有關說法屬實，新聞處未能與時並進，發揮職能，就可能會失去佢哋存在嘅價值。

最後，我想講嘅另一個平台，係網絡平台。facebook、YouTube、IG、同twitter等等，政府係有需要做功夫嘅，但呢啲始終係西方國家、反華勢力嘅主場，點努力都可能事倍功半，仲隨時會畀人封鎖帳戶滅聲，最近google拒絕移除錯誤國歌影片事件就係好例子。我哋國家一早就睇到有關問題，自己起過自己嘅平台，包括微信、tiktok，仲有最近嘅小紅書等，唔知有幾多特區官員識用呢？

希望政府真係扚起心肝，全面檢討政府嘅文宣工作，除咗宣傳策略同手法，相關嘅架構、人手、資源嘅運用都需要改革。主席，本人謹此陳詞，支持原議案及各項修正案。