公務員學院車位少 關觀塘塞車事

公務員學院選址喺出名成日塞車嘅觀塘,以「一地多用」模式興建。立法會公務員及資助機構員工事務委員會噚日討論項目,公務員事務局長聶德權話爭取本立法年度獲通過,目標係下年盡早動工, 5 至6 年內陸續完成。根據立法會文件,項目需要約45.4億元,除咗公務員學院,亦設公務員診所及政府牙科診所、地區康健中心、殘疾藝術家藝術廊等設施。

項目地庫設附屬停車場,有65 個泊車位,公眾停車場就有約70 個車位。建測規園界議員謝偉銓關注點解得咁少泊車位,公務員事務局常任秘書長楊何蓓茵話:「喺我哋經驗中,公務員多數用公共交通工具。」又話觀塘交通比較繁忙,如果太多公務員同事揸車去,該區道路就更加擠塞。

聶德權話檢視有冇修改空間

其他議員都有類似考慮。民建聯梁志祥話該處有基層醫療中心,除咗公務員上堂外,亦多人去。聶德權最終話會返去再睇睇車位數目、檢視有冇空間修改,喺工務小組會再交代。