「制訂協助青年向上流動政策和藍圖」議案發言

主席，要做到習主席提出嘅「青年興，則香港興」，以及我哋多位議員強調嘅，提升香港青年人嘅民族自豪感同主人翁意識，我認為重點之一，係要畀佢哋睇得見希望，包括喺事業上向上流動，以及可以置業安居嘅機會。

即使近期樓市有所回落，但私營住宅樓價仍然同大部分市民嘅負擔能力脫節，資助出售房屋成為唔少青年人同年輕家庭唯一嘅「上車」希望。可惜因為供應少，年青人，尤其係單身申請者中籤機會仲低過中六合彩，令到唔少人心灰，寧願將啲錢用嚟旅行、購物、飲飲食食，做「月光族」唔願意儲蓄，疊埋心水輪候公屋。為免收入超出申請資格，部分人更刻意避免升職加薪，寧願「打散」維生。青年不求上進，香港又點會興旺呢？

鑑於供不應求情況難以短時間改善，因此我喺幾年前已提出，要改革香港嘅資助房屋抽籤及分配制度，增加多次抽籤失利嘅申請人嘅中籤比率。隨着新一屆政府努力增加土地房屋供應，係咪可以做到，畀到每位合資格嘅青年人或年輕家庭，都有一個購置資助房屋嘅機會呢？

有啲青年人未必想喺短期內置業，但又唔合符資格，或者唔想申請公屋。故此我之前提出，增設一啲面積同設施好過傳統公屋，但租金較高，資產同入息限制較為寛鬆嘅「新公屋」，畀呢類願意力求上進，但又暫時無意置業嘅人士申請。

政府喺2012年提出青年宿舍計劃，但同興建過渡性房屋一樣，唔肯自己落水，搵NGO去做，結果起得又慢、又少。10年多過去，當年嘅青年人現已變成中年人。今年施政報告提出會擴大計劃，但仍然唔係政府直接興建，只係幫助NGO租用酒店或旅館房間作為青年宿舍，唔會諗下襯依家市道麻麻地，酒店同賓館經營困難，直接購入相關設施。所以我估計結果都係做得又慢又少，提速、提效成為空談。

主席，我代表嘅建測規園業界，年青人面對最大嘅問題，就相關大學學額不足，冇因應市場需求而增加。我近年已多次提出相關情況，今日唔再多講，只希望政府真係會認真考慮，採取行動，唔係齋講會反映跟進。

另外係行業生態問題，專業顧問服務市場，面對多年偏重「價低者得」嘅政府投標制度，令顧問費每況越下，但責任同工作要求卻不斷增加，導致業界普遍出現工時過長，文書及程序工作多，專業發揮空間卻減少嘅情況。經業界多番反映，近年政府係有關注同進行改革，包括優化招標制度、精簡與發展相關嘅法規同審批程序。但係做得唔夠快，唔夠精準，希望能從速改善。

最後，施政報告提出讓青年人參與地區建設，亦係我同業界多年來爭取嘅。同樣，希望當局做快啲，做多啲，畀我哋嘅年輕專業人士更多發揮機會，共同與建設香港，提升自豪感同主人翁意識。本人謹此陳詞，支持議案。