[:zh]就《2021年消防(裝置及設備)(修訂)規例》發言[:]

[:zh]主席，根據現行法例，任何消防裝備，包括喺好多地區早已廣泛應用，可以有效防範減少火災人命傷亡嘅「獨立火警偵測器」，喺香港都必須經由註冊承辦商安裝及每年要檢查。由於相關嘅安裝及檢查費用，往往仲貴過「獨立火警偵測器」本身嘅價錢，每年要搵人上門檢查亦相當麻煩，令到大部分市民都唔願意安裝。

將於今日通過嘅《2021年消防(裝置及設備)(修訂)規例》，目的就係豁免「獨立火警偵測器」嘅相關安裝同年檢規定，以鼓勵更多市民使用，對此我係大力支持。但豁免咗相關法定要求，唔代表消防處及其他部門可以唔做嘢或做少啲嘢，相反，我希望政府喺修例後會做更多嘢，以務實態度提升香港嘅樓宇消防安全。

政府首先要做嘅，係確保市面嘅「獨立火警偵測器」有良好嘅性能同品質，制訂相關嘅標準同指引，避免市民買入咗有問題嘅產品，反而增加咗消防安全風險。第二係要做好宣傳推廣工作，教導市民正確選購、安裝、使用及定期檢查家中嘅「獨立火警偵測器」。

對於獨居長者、少數族裔，以及居於「三無大廈」、失修舊樓同違法劏房嘅低收入家庭，政府唔單止要加強宣傳，最好係免費派發，幫埋佢哋安裝。坊間嘅「獨立火警偵測器」，一般只須幾百蚊，全港派1萬個都只係幾百萬，相對於人命係無價，以及每宗火災造成嘅財物損失，絕對物有所值。相關工作唔可能單靠消防處做，各區嘅民政事務處亦必須積極協助。

針對近年發生多宗致命舊樓大火，特首早前提出會修訂法例，授權消防處同屋宇署，直接為遲遲未能符合相關標準嘅舊樓，進行所需嘅消防安全改善工程，然後再向相關業主追回費用。有關修例建議獲得各界支持，但至今未見有何進展。我促請當局加快相關工作，制訂立法時間表，以及推展相關改善工程嘅計劃同目標，唔好又等到另一宗致命舊樓大火發生，先至急急修例，亡羊補牢。

作為建築、測量、都市規劃及園境界嘅立法會代表，我希望消防安全嘅法例唔好過於僵化，導致一啲受到本身設計所限嘅舊式樓宇同歷史建築物，根本冇任何辦法，或者要花上天價嘅工程費用，先至能夠符合相關消防安全標準。逼使有關業主有法不依，置消防安全於不顧，或者寧願將有關建築物荒廢丟空，等待拆卸重建，不利香港嘅房屋供應同文物保育工作。

近年消防處喺審批舊樓消防設施方面已多咗彈性，例如對水缸及灑水系統嘅規格要求，但仍然唔足夠，點解唔可以喺舊樓同歷史建築物訂立另一套更有彈性、有唔同階段級嘅消防標準呢？等啲業主就算做唔到100分，做到50分都好，好過乜都唔做，希望當局可積極研究跟進。本人僅此陳詞。[:]