[:zh]就修訂立法會《議事規則》議案之發言[:]

[:zh]主席，香港立法會嘅議會文化、秩序、議政質素同議事效率，喺最近呢十年每況愈下，情況可謂沒有最差，只有更差。喺反對派、攬炒派嘅摧殘肆虐之下，最近幾年更直頭係變成禮崩樂壞，導致特區施政舉步維艱，嚴重損害香港嘅經濟、社會及民生發展。

喺言語暴力方面，由最初嘅講粗俗用語、辱罵政府，變到講粗口、詛咒官員、鼓吹仇恨，我唔相信冇任何國家或地區嘅議會，會容許同容忍呢啲言論。

喺肢體暴力方面，由最初嘅掟蕉、掟紙牌、掟玻璃杯，演變成近年嘅搶咪、搶文件、搶手機，掟蟲、掟臭彈，甚至係拉起巨型黑布企圖阻擋鏡頭，然後推撞、毆打立法會保安人員。尊貴嘅立法會代議士淪為違法暴徒，行為甚至與恐怖份子無異。

喺拉布行為方面，由最初偶爾為之、針對特定法案或撥款拉布，變成完全無定向、無理據、無間斷、同無所不用其極嘅攬炒式瘋狂拉布。當中最經典、最離譜嘅，當然就係由公民黨前法律界立法會議員郭榮鏗主演嘅內會主席選舉拉布鬧劇，前後拉咗七個多月都選唔到內務委員會主席，令到立法會嘅審議法案職能完全癱瘓，影響大量經濟民生政策嘅落實推展。

部分反對派議員仲公然作出賣國賣港行為，包括將宣誓變「宣獨」，在明在暗咁鼓吹港獨、煽動黑暴、策動攬炒，甚至走到外國乞求外部反華勢力制裁中國同香港，要全港七百萬市民攬住一齊死，要全國十四億人民同受經濟損害。呢啲咁嘅人不單止唔配做議員，甚至連香港人、中國人都唔配做！

針對反對派、攬炒派嘅種種惡行，針對香港憲制同法律制度存在嘅漏洞與不足，中央政府近年多次果斷出手，協助香港止暴制亂，撥亂反正，藉此維護香港嘅繁榮穩定與長治久安，確保「一國兩制」實踐行穩致遠。包括喺2016年就立法會議員宣誓規定釋法、喺去年6月制訂《港區國安法》、喺去年11月就立法會議員資格問題釋法，以及剛剛喺本月11日通過、有關完善香港選舉制度嘅人大決定。

上述嘅全國人大決定及人大常委會嘅釋法，成功、迅速咁幫香港解決咗港獨、黑暴同外國干預等問題，並從選舉源頭堵截咗立法會嘅攬炒黑暴同癱瘓施政行為，確保「愛國者治港」嘅原則得以全面落實。對此我當然全力支持，並會積極配合往後嘅本地立法工作。

不過，對於一啲打擦邊球、未去到明顯違法違憲嘅劣質議會行為，有關人大決定同釋法未必完全處理到，事實上呢啲問題亦唔應該由中央處理，特區政府、香港立法會、我哋香港嘅建設力量，絕對係有責任同有能力去自行處理！

今日呢個由立法會議事規則委員會主席、謝偉俊議員所提出嘅議案，目的正係要糾正過往嘅議會亂象，堵塞現行立法會《議事規則》存在嘅種種漏洞，為人大311決定要求嘅「切實提高特區治理效能」，喺議會規程方面提供更健全、有效同長遠嘅制度保障。對於呢個大原則同改革方向，我亦係全力支持嘅。

今次議案共分18條，內容相當細緻同全面，包括防止議員濫用議會規程，假借提出休會辯論、中止議案、私人草案或特權法議案嚟拉布，對議員嘅發言範圍、發言時限同表決安排加以規範等。在此我再次感謝各位議事規則委員會委員，以至立法會秘書處相關同事所作出嘅努力。

當中最多人談論嘅修訂第10條，即設立議員「停賽機制」，對於屢次被裁定行為極不檢點，屢勸而不改、屢罰而不理嘅議員，立法會主席可藉通過議案，暫停佢哋嘅議員職務一段時間，以避免呢啲搞事分子繼續破壞議會秩序同阻撓會議進行，減輕佢哋嘅劣質議會行徑，對經濟、對社會所造成嘅影響。

其實有關做法並非香港首創，唔少外國議會都有咁做。我希望有關方面會進一步研究，能否向被停職嘅議員扣薪，即係暫停向佢哋發放議員酬金及相關嘅工作開支津貼，因為咁先係最具阻嚇性，亦減少浪費納稅人嘅公帑。

另外係關於修訂第16條，訂明任何委員會如未能及時選出新一年度嘅正副主席，原有嘅上年度正副主席可以繼續履行職務，確保相關委員會嘅工作可以如常進行。呢條修訂正正可以針對好似去年嘅內會主席選舉鬧劇，大可簡稱為「郭榮鏗事件」。我就郭榮鏗嘅攬炒拉布行為，先後寫過不下四、五篇文章批評佢，對於呢條修訂我當然會支持。

最後我想講吓有關縮短議員發言時限嘅問題。我喺內務委員會討論有關修訂建議時都表達過，原建議將部分議案嘅發言時限大幅縮短，由每人最多講7分鐘至15分鐘，削減至只有3分鐘至5分鐘，我係有保留嘅。

對於一啲比較複雜、專業、對個別業界會造成較大影響嘅法案同議案，5分鐘嘅發言時限相信係太短。雖然人大決定立法會議員人數將增至90人，每人講多1分鐘，加埋就用多成個半鐘，但其實呢個問題，係可透過限制個別議案嘅整體辯論時間去處理嘅。

依家嘅修改建議，即修訂第8條，並無明文規定議員就個別議案嘅發言時限，改為授權內務委員會去向立法會主席作出建議，而大主席亦有權酌情調整議員同議案嘅發言時限。我希望內會其後作出建議，以及主席喺執行有關規定時，會考慮我嘅觀點。

主席，相信唔少現時喺立法會嘅議員都感受到，喺大部分攬炒派被取消議員資格、自行辭職、或者「著草走佬」之後，現時大家嘅工作量都多咗，工作壓力大咗，選民、市民、以至國家對我哋嘅期望亦高咗。

喺今次通過修改《議事規則》，以及稍後通過有關完善選舉制度嘅本地立法之後，呢種壓力同期望都會更加大。希望大家都繼續加倍努力，積極與會議政，更有效咁配合同監察特區政府施政，是其是，非其非，提高特區嘅治理效能，致力為香港老百姓謀福祉，向市民展現高質、高效、同高尚嘅新議會文化。本人僅此陳詞，支持議案。[:]