就提高持槍保安員年齡上限的決議案發言

主席，首先申報我係物業管理業監管局嘅主席。今日嘅決議案同我並冇任何利益關係，嚴格嚟講亦同物監局嘅工作唔直接相關。但其實議案嘅內容，係反映咗依家保安人員同物管業界，尤其係前線工作人員，以至係整個香港出現嘅勞動力不足同高齡化嘅問題。

議案建議將「保安人員丙類許可證」，亦即擔任「須攜帶槍械彈藥執行的護衞工作」嘅年齡上限，由現時嘅最高55歲，放寬至60歲。有關建議我係支持嘅，因為隨着醫學進步，大家更注重健康，好多香港人過咗55歲，甚至更高嘅年紀，都照樣健步如飛，體能未必差過部分後生仔，喺經驗、紀律方面可能亦更有優勢。

現行法例規定保安人員由55歲起，不論佢哋嘅身體狀況如何，都不能再擔任持槍護衞工作，明顯係不合時宜嘅。我甚至認為係咪建議都係太保守，可以考慮將上限再提高至超過60歲。所以，係咪可以改為好似依家甲類同乙類保安員嘅做法，只要現有嘅丙類保安員每年提交醫生證明，就可以畀佢哋過咗60歲，都繼續擔任有需要持槍嘅護衞工作呢？

事實上，隨着生育率下降同外來年青移民減少，香港嘅人口老化及勞動力不足問題正急速惡化。保安、物管業亦唔例外，大家都見到身邊唔少清潔工、保安員、同其他類別嘅物業管理人員，年紀往往都有咁上下。

其實保安員同物管從業員嘅發展潛力係相當大，人力需求持續上升，但肯入行嘅年輕人唔算多，某程度係因為香港嘅青年同佢哋嘅家長，覺得物管業又悶又辛苦，社會地位唔高，好似冇乜前途咁。喺呢方面，業界同政府要多做工夫，例如主動向中學生同大專生，講解物管業嘅最新發展同良好前景，希望有更多人加入呢個行業。