就最後一輪《議事規則》修訂議案之發言

主席，今次修改《議事規則》議案，係本屆立法會嘅第五次、亦係最後一次嘅類似議案。今次修訂涉及嘅條文唔算多，但範圍就相當廣泛。透過簡介有關修訂，可以幫市民重溫一下，喺過去幾年攬炒派當道時候嘅荒唐議會歲月，同時對比一下，喺完善咗選舉制度同《議事規則》之後，立法會嘅理性、高效同高質嘅審議工作。

修訂嘅第一部分，係因應本會早前通過嘅公職人員宣誓草案，修改立法會議員嘅宣誓安排。該草案係源自2016年嘅宣誓風波，當年多位攬炒派議員借宣誓公然宣揚港獨，並以「支那」字眼辱華，引起全球華人震怒，當日宣誓嘅胡鬧場面，相信唔少人都仍然記憶猶新。

第二部分嘅修訂，亦係為咗落實本會早前通過嘅另一條草案。當議員因行為極不檢點而被罰「停賽」，或者係喺立法會流會時無理缺席，立法會就可以暫停向有關議員發放薪酬或施加罰款。

過去幾年嘅攬炒派議員嘅極不檢點行為，暴力同野蠻程度不斷升級，道德底線愈跌愈低，由最初嘅講粗口同掟吓蕉，演變成後期嘅搶手機、搶文件、掟臭蟲、撥臭水，甚至係毆打保安人員，早已超越「行為極不檢點」嘅定義，而係極之可恥同埋無賴嘅。透過點人數嚟拉布甚至引發流會，亦由以往偶爾為之，變成日日點、次次點，令立法會運作陷入癱瘓，嚴重咁損害香港嘅經濟民生發展，其實扣幾多錢都補唔番！

另一部分修訂係有關法案嘅恢復二讀，源於歷時大半年嘅內會主席選舉拉布鬧劇。當時以郭榮鏗為首嘅攬炒派議員，透過拖延內會主席選舉嚟癱瘓內會運作，令大量關乎經濟民生嘅法案無法適時審議同通過，包括有關增加法定有薪產假、引入垃圾徵費、以及剛剛喺昨日通過嘅禁售電子煙草案，幾乎全部被拖垮。今次修訂釐清咗相關恢復二讀嘅程序，避免同類事件再次發生。

仲有一部分嘅修訂，係為咗配合經過改革完善嘅新一屆立法會嘅運作，包括因應下屆立法會增至有90名議員，而取消財委會委員必然制，改為由議員自行報名參加，但整體人數不得少於50人。另一改動係因應選委會界別嘅重新設立，而調整分組點票嘅計算方法。 主席，現屆立法會會期下個禮拜就結束，換屆選舉仲有唔夠兩個月就舉行，下屆立法會肯定會有好多新面孔，亦會有部分本會嘅議員留任。希望大家都充分善用經過完善嘅選舉制度同《議事規則》，盡責履行行政立法互相配合、互相制衡嘅憲制職能，體現「愛國者治港」嘅原則，透過高效高質嘅審議工作，為國、為港、惠民，切實提升特區嘅治理效能。本人僅此陳詞，亦都代表「六人組」支持有關議案。