就玻璃樽生產者責任計劃議案之發言

主席，我發言係支持環境及生態局局長，根據《產品環保責任條例》提出嘅決議案，內容係有關全面落實「玻璃飲料容器」嘅生產者責任計劃，以促進玻璃樽嘅回收重用同循環再造，尤其係用量最大嘅啤酒樽、餐酒樽、牛奶同荳奶樽等，從而減少浪費資源，減輕堆填區嘅壓力。

有關玻璃樽生產者責任計劃主體法例修訂，早喺2016年6月，即係上屆、再上屆嘅立法會通過。點解等到超過6年之後嘅今日，先至訂立相關附屬法例以全面落實計劃呢？可能未必全部係政府嘅問題。

2019年黑暴期間，當局擔心啲暴徒會偷晒啲回收玻璃樽嚟製造汽油彈，所以一度叫停咗相關收回計劃。之後又爆發疫情，好多餐廳、酒吧同相關供應商生意大受打擊，部分冇營業，甚至結業，呢啲都影響到實施徵費同回收嘅工作進度。但無論如何，6年幾始終係好長嘅時間，政府有冇善用呢段時間，處理好實施時預視嘅問題呢？

*對於計劃嘅實施細節，我同唔少環保人士都係有意見嘅。第一係徵費水平，每公升建議只收9毫8子($0.98)，仲平過加價後嘅塑膠購物袋徵費。而且徵費係直接向生產商、入口商等商戶收取，係咪有足夠誘因，促使佢哋花錢投資設立回收機制，從而申請豁免繳付相關徵費呢？*

*第二係計劃嘅適用範圍，暫時只包飲料容器，但其實一般家庭用得最多嘅，反而係用嚟載豉油、調味料、以至化妝品嘅玻璃樽。政府話呢啲非飲料玻璃樽需要較繁複嘅清洗工序，唔符合成本效益，仲可能會整到啲回收設施污糟邋遢，市民更加唔想使用，因此冇納入徵費同回收重用計劃。*但如果回收商收到啲洗乾淨咗嘅非飲料玻璃樽，都照樣會處理嘅。

呢個其實係宣傳教育問題，尤其喺明年下半年實施家居固體廢物徵費計劃之後，啲玻璃樽又大件又重，市民願意洗乾淨再分類回收嘅誘因而大咗。只要政府加強宣傳教育，以及畀到市民信心，佢哋辛辛苦苦洗乾淨放落回收筒嘅玻璃樽，唔會轉個頭又送咗去堆填區，相信好多市民會願意咁做。

*第三係回收咗嘅玻璃樽嘅用途，最好當然係可以重用，但依家只有大型生產商先做到。如果可以做到統一設計同容量，相信可以提高重用嘅機會。呢方面必須由政府牽頭，單純靠市場同業界好難做到。*

對於唔能夠直接重用，必須打碎後循環再造嘅玻璃，依家嘅用途係比較局限，多數用作環保磚、建築材料等。一旦回收量大增，可能導致供過於求，影響回收價值。希望當局同有關專家再諗下計，有冇更廣泛同更有價值嘅用途，咁樣成個回收計劃先達至最佳效果。

最後，我希望政府喺環保回收、減廢減排方面，唔單只係愈做愈好，仲會愈做愈快，唔使要大家再等多6年，先至優化同擴大相關計劃。主席，本人謹此陳詞。