[:zh]就疫情期間以視像會議開會的議案發言[:]

[:zh]主席，香港喺去年1月23日，錄得首宗新冠肺炎確診個案，至今已差不多有1年。期間立法會同政府及好多企業一樣，喺疫情嚴重時實施特別上班安排，盡量安排職員在家工作，減少或押後一啲不必要、冇逼切性嘅會議，藉此減少議員、官員同職員嘅接觸機會，降低感染病毒嘅風險。

然而，立法會工作繁多，包括審議及通過法案、審核及批准政府嘅財政預算案同其他開支撥款，需要開會討論及審議。立法會長時間開唔到會，唔單止政府運作會受到嚴重影響，整個香港嘅經濟及民生發展、全港700多萬市民嘅日常生活，都會受到一定程度影響。

雖然現時已有多款疫苗研發成功，但疫情仲要持續幾耐先過去，依家我相信冇人答得到，立法會必須繼續有效率地運作。就此，對於今次議案提出，落實喺疫情期間，以視像會議方式舉行部分立法會委員會會議嘅議案，原則上我係支持嘅。希望透過科技嘅應用，一方面可以加強防疫，一方面亦都可以維持立法會嘅運作效率。

事實上，相關嘅視像會議軟件及技術，早已獲眾多嘅企業、機構、學校，以及多個外國議會採用，亦曾經喺立法會個別委員會嘅非正式會議上試行，暫時睇唔到有咩大問題。

不過，上周五內會討論有關安排時，我特別要求秘書處留意，以視像方式開會嘅網絡保安、尤其係身份認證問題，喺進行表決時，點樣確保喺電腦熒幕上見到嘅某位議員，係真正嗰位議員嚟嘅，而唔係事先錄影、甚至以電腦合成嘅影像呢？

主席，我希望我嘅關注只係過慮，但過去幾年嘅經驗話我聽，喺立法會真係咩事都有可能發生！包括搶手機、搶文件、掟臭彈、打保安、宣誓變咗「宣獨」等等，喺事前相信好少人會諗到，但事實上就係有人咁樣做。

以黑客入侵等方式擾亂、惡搞立法會嘅視像會議，將開緊會嘅議員改頭換面、配過第二把聲、製造畫面時差，令到贊成變成反對，將來會唔會發生呢？有關做法算唔算係違反特權法？係咪等同妨礙議員開會，同干擾立法會嘅實體會議進行呢？呢啲係我哋要關注嘅問題

雖然今日嘅議案僅適於部分委員會會議，唔包括大會、財委會等，擁有法定最終審批權嘅會議，不過我都希望大家可及早防範，唔好掛萬漏一。

此外，雖然係出席視像會議，我希望、亦相信議員同事都會注重開會質素，視作親身到立法會開會一樣，積極、主動咁履行職責，為市民監察政府、為香港出謀獻策。最後，我更加希望疫情可以盡快消減、市民可以盡早恢復正常生活，立法會可以變番全部實體開會。本人僅此陳詞，支持議案。[:]