施政報告致謝議案發言 第四節：共同維護和諧穩定

主席，我一向關注香港嘅環境衞生同市容問題。新政府一上場就推出「打擊衞生黑點計劃」，我當然支持喇，但單純掃街洗地並唔足夠，應同步美化市容。施政報告亦都有採納我嘅意見，提出會美化公共空間，同優化街道景觀。

我亦提到地區嘅小型項目，應該畀多啲青年人參與機會，包括建測規園界嘅年輕專業人士，等佢哋有空間發揮，提升對社區、香港嘅歸屬感。報告亦有回應，推出「青年參與倡議計劃」，鼓勵佢哋就各類地區建設提供意見，呢點亦係值得一讚，我希望有關項目可以盡早推出。

不過，要實現習主席提出嘅「青年興，則香港興」嘅目標，最重要係畀青年人看得見希望。十年前，政府為咗提供一啲低於市場租金嘅居所俾年青人租住，推動非政府機構興建青年宿舍，但起得又慢、又少、又貴，依家建議租用酒店作為青年宿舍，係另一個嘗試，但係咪可以再破格啲，趁市況麻麻，成幢酒店買咗佢呢？

本人謹此陳詞，支持致謝議案。