[:zh]施政報告致謝議案首輪發言[:]

[:zh]主席，我係發言支持，就特首發表2020年施政報告嘅致謝議案。今份施政報告，原定係喺去年10月中公布，但由於特首希望等埋佢訪京，與內地相關部委同廣東省政府敲定多項中央惠港措施，而延遲至11月底先發表。

有關嘅延期我認為係值得嘅，因為除咗就如何進一步支持香港嘅經濟、金融及創科發展，達成咗一系列嘅共識，喺施政報告公布同落實外；更重要嘅係，經過與中央部委及廣東省協商溝通之後，今份施政報告嘅內容同措施，終於突破咗過往特區政府，長期「以香港作本位」、「以深圳河為界」嘅狹隘保守思維。

報告強調香港要把握「一國兩制」、同埋「近水樓台先得月」嘅優勢，發揮「國家所需、香港所長」嘅作用，積極參與國內國際雙循環，更好地融入國家發展大局，呢啲都係我同唔少市民一直倡議嘅。尤其係喺美國對中國與香港嘅瘋狂打壓，以及新冠病毒疫情全球大爆發嘅前提下，香港要戰勝疫情、振興經濟、再創高峰，就必須進一步加強與內地融合，包括把握粵港澳大灣區規劃發展所帶嚟嘅龐大機遇。

施政報告提出咗多項協助香港市民與企業把握大灣區機遇嘅措施，包括推出全新嘅「大灣區青年就業計劃」、優化現有嘅「大灣區青年創業資助計劃」、成立名為「Go GBA」嘅一站式支援平台，仲有加快河套區創新科技園發展、推出免配額「港車北上」計劃、落實皇崗/落馬洲口岸一地兩檢等等；唔少過去我同業界都有提出，等咗幾年，依家政府終於肯做喇。

不過，市民同業界最擔心嘅係，上述種種措施，政府係咪講得出、做得到，以及要幾耐然後先至做到呢？會唔會講咗就等於做咗？或者係做咗，但係冇人知、冇成效，就等於早前就有調查顯示，雖然香港嘅青年人，近年對大灣區認識多咗，但有意、願意去當地發展嘅比例就依然係好低，想去嘅亦唔清楚點樣做，政府又會有乜嘢嘅協助。

主席，相對於其他專業，香港嘅建造業，喺開拓內地市場、把握國家發展機遇方面，一向走得比較前。例如香港測量師同內地嘅專業資格互認，早喺2004年、當時我做學會會長嘅時候已經落實。

到去年中，雖然先後受黑暴同疫情影響，喺發展局同內地相關部委支持下，我同業界成功爭取到內地當局推出《暫行辦法》，容許合資格嘅香港建造業相關專業人士同企業，以簡單備案方式，取得資質同資歷嘅認可，可以直接喺前海、以至整個大灣區執業同接生意，為業界開完大門、再開小門，呢啲係值得我哋讚許。

最可惜，特區政府對於有關惠港措施嘅宣傳推廣仍然不足，唔少業界都話唔清楚有關措施。想申請備案，有疑問，要搵資料，政府網頁除咗措施公布當日發出嘅新聞稿，似乎就乜都冇，有唔少界別人士都要求我辦事處協助。我當然會盡量幫佢哋，搵內地相關部門幫忙，同時約埋兩地政府官員向業界搞簡介會。所以喺呢度，我希望政府喺推廣宣傳方面，可以做多啲、做好啲。

國家主席習近平，早前喺深圳經濟特區成立四十周年慶祝大會上發表講話，為深圳嘅未來發展方向提出「六點要求」，有關講話我認為係同樣適用、甚至更加切合香港。好似係要求官員「積極作為，深入推進粵港澳大灣區建設」，包括推動三地經濟運行嘅規則銜接與機制對接，加快城際鐵路建設，提升市場一體化水平，吸引更多港澳青少年到內地學習、就業同生活。

雖然施政報告喺吸引青年人到大灣區發展方面，已經提出咗唔少措施，但對於規則銜接與機制對接，尤其係政府決策同埋整體城市規劃等方面，我未見到有咩突破同新猷。

大灣區發展辦公室去年成立咗嘞，至今做咗啲乜嘢呢？由特首擔任主席嘅「大灣區建設督導委員會」，成立咗已經超過咗兩年，又做咗啲咩呢？點樣改變成個政府，包括各個政策局同部門，以及各級公務員，過往「以香港作本位」、「以深圳河為界」嘅固有思維呢？我同好多市民及業界人士，都好想見到更多實質嘅成效。

主席，施政報告另一個亮點，係推行公營部門改革，強調政府除咗做「規管者」同「服務提供者」之外，亦係「促成者」及「推廣者」，應該為各行各業「拆牆鬆綁」，包括有關土地發展嘅管制同審批程序。呢啲同樣係我同建測規園業界多年來嘅訴求，依家終於能夠明確納入為政府嘅指導政策，對此我係深表歡迎。

香港嘅公務員制度，過住係廣受各界推崇同讚賞嘅，特別係喺廉潔奉公、守法依規方面。不過，面對回歸後出現急速轉變、愈趨政治化、複雜化嘅經濟同社會環境，以及市民不斷提高嘅訴求同期望，之前可能係行之有效嘅制度，現在不一定係產生同樣嘅成效。尤其係喺前瞻性、積極性、果斷性、創造性同問責性方面，顯然係有唔少改善空間。

事實上，習近平主席早喺2017年7月，向現屆特區政府發表嘅講話，已點出咗香港嘅管治問題癥結，其中兩點係「為官避事平生恥」，以及「上下同欲者勝」。

好可惜，香港社會經過前後長達一年半嘅黑暴及疫情肆虐，愈嚟愈多市民都感到，部分官員同部門遇難避事、敷衍塞責、各自為政、只懂按本子辦事嘅情況，希望特區政府能夠積極改善。

對於「為官避事平生恥」，公務員嘅積極性、創造性同問責性問題，習主席去年嘅深圳講話亦好值得我哋參考。佢強調為官者必須堅定理想信念、更新智識觀念、掌握過硬本領，自覺站喺國家大局上想問題、辦事情，並要建立健全激勵機制，推動形成「能者上、優者獎、庸者下、劣者汰」嘅正確導向。

反觀香港嘅官場文化同公務員制度，唔少人批評係「做殘能者、玩殘優者、包容庸劣者」。所以我真係好希望，香港有更多兼備堅定信念、新智識、硬本領與國家大局思維嘅官員，少之又少。

政府唔少政策措施、發展計劃，畀人感覺係冇具體目標、冇時間表、冇成效指標。做唔到、超咗支、延咗期、走咗樣，往往都無人負責。部分職系嘅官員，每隔幾年就調一次，缺乏延續性，上手做落嘅嘢冇積極跟進完善，難處理嘢就留畀下手。我希望以上嘅批評都係言過其實。

另外，公務員嘅評核制度，唔少人都批評係助長「少做少錯、唔做唔錯」嘅官僚文化。做得好嘅冇獎勵，做得差嘅冇處分，扼殺積極性同創造性。坊間更有講法指出，有啲官員特別勤力、特別做得好，佢哋嘅上司反而會喺評核時寫佢差啲，等佢遲啲先升官、遲啲先調走；反觀做得差嘅、懶散嘅、不求上進嘅，就可能會寫佢好啲，等其他部門願意接收，可以快啲調佢走。我唔知呢個說法有幾真、有幾普遍，但希望在席嘅公務員事務局局長會正視。

因應新冠病毒疫情，政府先後多次實施特別上班安排，要求並非提供緊急及必要服務嘅公務員在家工作，希望可減少社交接觸，避免病毒傳播，呢個做法係無可厚非嘅。

不過，喺有關措施剛剛實施時，唔少私營業界向我反映，因為唔少部門同公務員，因為缺乏指引及設施，無辦法有效在家工作。電話打唔通、留言信箱爆晒、實體會議開唔到，視像會議亦冇相關嘅設施或指引，令好多與土地房屋發展相關嘅審批工作停頓、拖慢，影響業界生計同香港嘅發展同建設。

喺我同業界多番反映及發展局努力跟進之下，上述情況依家已經有所改善，但同正常嘅工作效率仍有一段距離。我哋業界建議以實時視像、3D素描等新科技、新方式，取代部分傳統嘅實體地盤巡查、驗收等，至今只有極少數做到，智慧政府係咪只流於口號呢？我希望政務司司長、公務員事務局局長、創新及科技局局長等，可以跟進、推動。

最後係「上下同欲者勝」。前年黑暴肆虐，警方與保安局疲於奔命，希望盡快止暴制亂，但其他政策局與部門，有冇「上下同欲」，全力提供協助呢？期間各類假新聞、假消息滿天飛，有教師喺學校公然「播獨」，鼓吹仇警同起底，煽動啲學生參與違法暴力活動，新聞處唔理、教育局唔理，香港電台更好似企埋喺對面。最近教育局、新聞處等，都明顯積極咗，但同唔少市民嘅期望仲有距離。

面對今次世紀疫情，不少市民都批評，睇唔到政府有「上下同欲」嘅表現同決心。之前有密切接觸者，等咗幾日都未獲送去檢測，衞生署話佢哋唔夠人手，司長亦話唔係設施問題，係人手問題，香港唔係有19萬多公務員嘅咩？我見聶德權局長已好努力，最近已經安排咗一批紀律部隊人員，幫手做個案追蹤同安排送檢等工作，但其他部門同職系嘅人員呢？係唔係忙到冇能力支援抗疫、防疫工作呢？

主席，尋日公布嘅最新失業率升至6.6%，創下16年來新高，估計隨着全球及本地疫情持續，更多企業捱唔住要執笠裁員，失業率好快就會「破七」，甚至打破03年沙士時候嘅紀錄。香港要重振經濟、恢復通關，首先要戰勝疫情；要成功戰勝疫情，整個政府、全體19萬公務員，以全體香港市民，必須「上下同欲」，切勿「遇難避事」。

主席，以上係我就施政報告部分章節嘅發言，稍後我會就覓地建屋、發展保育、活化舊區等議題，發表我同建測規園業界別嘅意見，僅此陳詞。[:]