有關「限聚令」及「口罩令」修訂決議案之發言

主席，政府過往根據《防止及控制疾病條例》修訂「限聚令」同「口罩令」嘅內容，例如將限聚人數由4人變成2人，又或由2人變做4人，都係經由特首會同行政會議通過，然後向立法會提出以「先訂立、後審議」嘅規例嚟落實。

根據「先訂立、後審議」嘅做法，有關規例喺刊憲後就立即實施生效，但係立法會仍然有權就規例內容進行審議，喺有需要時候議員可以提出修訂，以至廢除有關嘅規例，藉此發揮監察及制衡行政機關權力嘅憲制職能。

不過，喺最近一次修訂「限聚令」同「口罩令」，政府喺未經正式嘅諮詢同討論之下，廢除咗上述嘅「先訂立、後審議」修例機制，改為經食衞局局長單方面發出公告，唔使經立法會，就可以自行修改「限聚令」同「口罩令」嘅內容。

政府聲稱有關改動，可以令修例程序變得更快捷、順暢，更有效咁應對快速變化嘅疫情。但實情係立法會從來都冇試過濫用原有嘅「先訂立、後審議」機制，去阻撓政府修例應對疫情。香港嘅防疫抗疫措施過往出現延誤，同立法會審議相關立法程序完全無關。政府今次做法，難免會令人感到係不尊重議會，甚至係想削弱立法會應有嘅憲制監察權力。

喺多個黨派嘅議員合力研究、齊心發聲之下，政府喺最後一刻改變初衷，接納咗原本由議員提出嘅修訂決議案，恢復番過往行之有效嘅「先訂立、後審議」修例機制。我認為今次事件，充分顯示立法會有效咁履行憲制職能、盡責咁發揮監察政府功能，絕對唔係「橡皮圖章」。

在此我亦要感謝本會嘅法律顧問，以及多位聯手向政府提出相關問題，爭取改變嘅議員同事。包括我哋G19嘅副召集人簡慧敏議員，我知道佢喺審議同草擬有關決議案方面，做咗大量工作，提出咗好多意見，向一啲唔係好熟悉或留意有關法律爭議嘅議員，細心講解，爭取支持。

主席，現屆政府任期仲有大約兩個禮拜就屆滿，我希望新一屆特區政府，可以從今次事件汲取教訓同經驗，加強往後與立法會嘅溝通合作，尊重議員同議會嘅憲制職能及權力，攜手引領香港戰勝疫情，再創高峰。主席，本人謹此陳詞。