有關垃圾收費計劃實施日期的察悉議案發言

主席，首先，我同其他多位議員一樣，對政府推行垃圾收費計劃嘅工作感到不滿，尤其係配套設施方面，包括廚餘及其他分類回收設施嘅設置、回收業嘅支持等等。

正如近日一啲前官員講番，通過按量收費嚟減少固體垃圾嘅政策，政府早喺20年前已提出，之後做過多輪嘅諮詢。我喺2012年首次當選立法會議員，就同過政府官員及其他議員一齊去南韓考察，了解當地實施垃圾收費嘅情況，貶下眼又10年喇。就算由2021年立法會三讀通過法例起計，亦已經過咗兩年幾，冇理由相關嘅宣傳教育同配套設施都仲未到位！冇理由經過兩度押後實施，到依家試行階段，都仲有咁多甩漏！

不過，正正係因為整個社會，立法會，仲有幫政府做咗大量籌備工作嘅物管、清潔業界，大家都花咗咁多時間同精力去迎接垃圾收費計劃，去到依家臨門一腳，無論係做官員定係做議員，都應該迎難而上，協助市民適應同解決問題，唔應該決而不行，有法不依。

作為建測規園界嘅代表，以及物業管理業監管局嘅前主席，過去幾個月我就舉辦過多場講座同交流會，了解物管同清潔業界喺執行垃圾收費遇到嘅疑問同困難，與官員溝通協調，政府亦作出咗唔少跟進。

對於部分市民同食肆商戶，抱怨收費計劃會會增加開支同帶來一定不便，正如年半前我提出將購物塑膠袋徵費提高至2蚊時指出，人類對地球嘅污染，對自然生態嘅破壞，往往就係貪平、貪方便所引致。保護環境係要付出嘅，包括企業營運成本可能會高咗，市民嘅生活習慣要改變。垃圾收費，分類回收，源頭減廢，喺日本、南韓、台灣等多個區內城市都已實施多年，冇理由就係香港做唔到。

主席，我希望政府會汲取教訓，接納批評，喺進行緊嘅試行過程中，盡快做好相關嘅宣傳解說同配套，減少市民因實施收費而對生活嘅影響，讓收費計劃得以順利實施，而非遇難避事，將整個計劃擱置；否則過去十多二十年，社會各界作出咗嘅努力就會白費；香港嘅垃圾棄置量就無法減少，政府要用更多嘅公帑同土地，去興建更多堆填區同焚化爐；到時有份要求擱置垃圾收費嘅人士，就唔好又話因為有地區人士反對，而唔支持有關嘅工程計劃。本人謹此陳詞。