選舉制度修改後,選委嘅選民基礎大變,要做選舉委員會嘅選民,要喺7 月5 號前登記。立法會建築、測量、都市規劃及園境界議員謝偉銓(Tony)噚日喺facebook話填咗4份選委表格,噚日正式遞交。
兩票自己投 兩票授權他人
其實Tony 本人無4 票咁多,但佢因為有唔同公職,所以依例登記授權投票人。佢解釋,第一份表係以立法會議員身分登記做當然選委;第二份係以全國政協委員嘅身分,登記為立法會新增嘅「人大、政協及全國性團體」界別選民。
Tony 話佢本身係物業管理業監管局主席,而物監局係選委會建測規園界15名當然委員之一,但因為佢以立法會議員身分做當然選委,所以依例要指定物監局另一人替補,就決定委任副主席許智文,所以要填第3份表。另外,物監局亦係該界別嘅56 個團體選民之一,依例要登記一個授權投票人,物監局就搵咗行政總裁蕭如彬做,因此要填第4份表。