《維護國家安全條例草案》全委會第二次發言(國安教育)

主席，今次發言，我會集中講政府就草案第8部，「維護國家安全機制及相關保障」提出嘅多項修正案。

要有效維護國家安全，除咗靠執法同檢控，各個政府部門同各級公務人員嘅齊心推動，積極協助，以及相關宣傳教育工作，亦至為重要。草案第107條訂明，特首可向特區政府嘅任何公務人員發布行政指令，以落實由中央就維護國家安全發出嘅指示，以至係特首認為有利於維護國安嘅其他事宜。

審議期間，我提出相關條文似乎未夠完善同清晰。因為香港有唔少以公帑營運嘅法定及公營機構，佢哋嘅工作對於維護國家安全亦相當重要；相關人員即使並非政府公務員，亦同樣係有權亦有責。局長提出修正案，清楚訂明政府轄下嘅「任何部門或機構」，都需要遵守特首發出嘅相關行政指令，令條文更為完備。

草案第108條訂明，公務人員須協助維護國家安全工作，但原有寫法過於籠統，難保會有少數別有用心，或者遇難避事嘅公務人員，故意鑽法律空子，對特首嘅指令或者其份內嘅維護國家安全工作，hea住做，求其做，搞「軟對抗」，削弱特區嘅維護國安機制。

好高興政府採納咗我同委員嘅意見，提出修訂，訂明特區嘅部門、機構同公務人員，都必須就維護國安工作，「及時提供一切合理的便利、 配合、支持和保障」、「及時提供所需的人力及其他資源」，以及「運用其享有的一切權力及酌情權」等等，寫法更為清晰全面。

我喺法案委員會亦問過，特首向公務人員發出嘅行政指令，內容係咪包括推動國家安全教育；促成政府提出修訂，喺草案加入全新嘅第107B條，訂明政務司司長可為開展國家安全教育、提高特區居民嘅國家安全意識同守法意識，以及相關嘅宣傳、督導工作，向適當人士提出意見或指示。

我認為有關條文係非常重要，只要有更多市民、尤其係青年人提高維護國家安全同守法嘅意識；不單自己唔會以身試法，仲會自發協助維護國家嘅安全、主權同發展利益；咁無論係《港區國安法》定係23條立法，將來都可以備而不用，香港嘅繁榮穩定亦可得以維持。

主席，能夠成為法案委員會15位委員之一，我實在深感榮幸。喺過去一段時間嘅馬拉松式審議，各名委員都履職盡責，踴躍提問，積極獻策；政府團隊亦清晰回應，詳盡解說，從善如流，希望促使草案內容更趨完善，更好地履行特區嘅歷史任務同憲制責任。本人僅此陳詞，支持由保安局局長提出嘅各項修正案。