《追加撥款(2021-2022年度)條例草案》二讀發言

主席，最近每一年嘅《追加撥款條例草案》二讀，我都有發言，原因之一係過往反對派經常借呢條草案去誤導市民，講到政府又再超支，成日都洗腳唔抹腳咁，因此又要向立法會追加以百億元計嘅撥款。其實有關條例草案每年都提交立法會處理，目的只係喺會計帳目上，更新番之前一個財政年度嘅政府開支總目。草案內列出嘅所謂追加撥款，都已喺之前嘅財務委員會經議員同意通過，唔係新加嘅額外開支，因此我覺得係有必要再次發言澄清。

今次討論嘅2021-2022年度追加撥款，總額為351億元，當中有約269億元來係自政務司司長同財政司司長辦公室，主要係之前幾輪嘅防疫抗疫基金開支，全部已經喺財委會表決通過；來自食衞局嘅16億元同商經局嘅2.9億元，亦係與防疫抗疫相關嘅額外開支同貸款承擔額，都係好必要及有利經濟同民生嘅。唔係因為政府使大咗，而要嚟立法會攞錢填氹，因此我係會支持嘅。

然而，政府開支近年不斷膨漲，部門實際開支高於原來預算案嘅情況，係值得社會關注嘅。隨着疫情回穩，市民生活同經濟活動逐漸復常，估計來年需要再次推出巨額抗疫撥款嘅機會應唔高。但與此同時，受到俄烏戰事、全球能源危機、貿易保護主義，以及本港經濟同樓市回軟影響，再加上人口老化、勞動力不足等因素，預計嚟緊幾年港府嘅各類稅收，包括土地、物業收入都唔會好理想，財赤將難以避免。

財爺日前就預告，本年度庫房將錄得過千億元赤字，港府過往引以為傲嘅巨額儲備，將會不斷下降。政府一方面要積極有為，做到習主席要求嘅「切實排解民生憂難」，但另一方面亦要堅守審慎理財、量入為出、同應使則使嘅原則，嚴控政府開支及公務員編制增長，尤其係要杜絕個別部門大花筒、浪費公帑，以及喺制訂政策時一定要顧及成本效益。

主席，香港將於未來幾年大興土木，加快發展，包括中部水域人工島及北部都會區發展計劃、多項新鐵路同主幹道項目，造價都係以百億、甚至千億元計，難以全數靠政府嘅一般收入或財政儲備去支持。但呢啲都係有助香港發展、有利經濟民生嘅項目，係長遠嘅投資，唔應該因一時嘅經濟不景而擱置或拖延。

我促請財政司司長、財庫局局長，以及相關嘅工務部門，預早籌劃好有關問題，研究同制訂可行、多元嘅融資方案。除咗考慮個別項目，亦要通盤去睇，維持整體基建收支嘅可持續性，避免集中喺同一年度，突然間大量使錢或大幅借貸，變到好似早前英國政府咁對市場造成衝擊。本人謹此陳詞。