2022年「臨時撥款議案」

主席，我發言喺支持財經事務及庫務局局長，根據《公共財政條例》第7(1)條提出嘅決議案，亦即俗稱嘅「臨時撥款議案」。

政府新一年度嘅財政預算案，一般都係喺每年嘅2月底發表，即使一切順利，最快亦要等到4月中後期，先至獲得立法會審議通過，因此政府必須喺每年嘅3月31日，亦即上一財政年度完結之前，向立法會申請一筆臨時撥款，用以支付各個政策局與部門，由4月1日起至立法會三讀通過新嘅預算案之前嘅開支，以確保政府可以繼續正常運作，繼續為市民提供各類公共服務，而唔會受到立法會嘅審議進度影響。

呢項依家睇落相當技術性，甚至好似係「行禮如儀」嘅臨時撥款議案，過去曾經起過唔少風浪。喺幾年前，當反對派同攬炒派當道、惡意拉布盛行嘅時期，佢哋為咗削弱行政主導，癱瘓政府運作，又或者聲稱爭取一啲冇可能喺短期內做到嘅訴求，對預算案提出數千條嘅拉布式修正案，務求拖到臨時撥款耗盡，預算案都通過唔到，令政府被迫停擺。

喺最極端嘅時期，攬炒派甚至連臨時撥款議案都唔放過，進行拉布，企圖令到政府喺4月1日起就要落閘關門，無視政府及其他以公帑運作嘅機構癱瘓，對香港經濟同社會民生造成嘅嚴重影響。幸好，喺中央支持下，通過訂立《港區國安法》同完善選舉制度等重要舉措，令攬炒派同無理、惡意嘅拉布絕跡，立法會運作現已回歸正常，政府嘅議案得以有效率地審議、及通過。

講番今次嘅臨時撥款，總額達到接近2,705億元，相當於2022至2023年度政府總開支嘅39%，比率略高於過往幾年嘅水平。我注意到原因之一，係政府預留咗較多款項，給予食衞局、醫管局及社署等機構同部門，用作抗擊疫情及救急扶危等必要同緊急嘅開支，呢點係值得支持嘅。

另外，我亦留意到，今次嘅臨時撥款，預留咗較高嘅比例同金額，用作支付將於下年度退休嘅公務員嘅退休金，相信係與公務員隊伍逐步踏入退休高峰期有關。香港面對人口老化，勞動力不足，尤其係受到疫情影響，各行各業都出現人手短缺危機，我希望政府有效處理。我亦希望當中有心、有力嘅退休公務員，可以喺不同崗位繼續為市民服務，繼續為香港貢獻，包括以不同形式參與抗疫工作。本人僅此陳詞。