「改革香港的扶貧政策和策略」議案

主席，同好多國際大都會一樣，香港存在頗為嚴重嘅貧富差距問題。根據2020年嘅《香港貧窮情況報告》，如果以住戶入息計算，本港嘅貧窮人口多達165萬，即係大約每4個半市民，就有1個被列作「貧窮」。經過過去兩年多嘅新冠疫情打擊，找相信有關情況會變得更差。不過，如果計埋政府嘅種種支援措施，貧窮人口就會大幅減少到約55萬人。其中一項最主要嘅政府支援措施，我認為就係提供出租公屋。

多項研究都顯示，公屋係最直接、有效、而且持久嘅扶貧措施，原因大家都知道，因為香港嘅私樓樓價同租金實在太貴喇。打工仔女就算唔食、唔住，平均都要超過20多年先至儲夠錢買樓。居於狹小劏房嘅基層家庭，每月往往要花費佢超過一半嘅收入嚟交租，嚴重影響佢哋嘅生活質素，並加劇咗好似多位議員都相當關注嘅兒童貧窮、同跨代貧窮呢個問題。

因此，我認為香港嘅首要扶貧策略，就係全力咁加快覓地建屋，大幅增加出租公屋同資助出售房屋嘅供應，穩定同壓抑私樓樓價同租金，縮短公屋嘅輪候時間，減少劏房住戶數目，降低市民用喺住屋方面嘅開支比例。

鄧家彪議員嘅原議案亦都提出，要促進全民優質就業，尤其是係婦女同長者嘅就業情況，以及提升社會人力資源及整體僱員侍遇。事實上，除咗土地房屋短缺，香港亦面對日益嚴峻嘅人口老化同勞動力不足。《香港貧窮情況報告》亦都指出，本港有多達70萬嘅「有樓貧窮人口」，當中大部分都係長者，佢哋有資產，但係冇工作，因而冇收入，所以喺統計上同樣被列作「貧窮」。

人口老化同勞動力短缺問題，唔單止香港，喺日本同好多歐洲國家都面對，對應策略之一，係創造有利於長者就業嘅社會同工作環境，包括鼓勵私人機構更加可以增聘有心、有能力嘅長者，擔任兼職同顧問性質嘅工作。

政府要盡量鼓勵、促進有能力嘅市民自力更生，貢獻社會。包括提供更加多增值機會畀有志者，加強香港嘅職專教育、在職及轉職培訓，並給予適切嘅資助，從而將有限嘅公共資源，留番畀真正無法自食其力嘅弱勢社群，減少市民對直接福利資助嘅依賴。

主席，政府同立法會，喺檢視任何新增或現有嘅社會福利同退休保障措施嘅時候，必須考慮其可持續性、「錢從何來」，以及唔會削弱受眾嘅自力更生積極性等問題，避免相關措施隨住人口老化、資源有限而無力為繼。呢個亦係我喺考慮是否支持各項修正案嘅原則。主席，本人僅此陳詞。