《2024年應課稅品(修訂)條例草案》二讀發言

主席，我一向支持政府加強控煙，包括通過加稅嚟鼓勵及促使市民戒煙，或者最少令佢哋吸少啲煙，減少對非煙民嘅影響。政府近年多次調高煙草稅，我都有支持同加入相關嘅法案審議委員會，今年亦唔例外。好多論點我唔再重複喇，今次發言會集中向政府追數，對比番我去年就《2023年應課稅品(修訂)條例草案》嘅發言內容，檢視一下政府嘅工作進度同成效。

我喺去年嘅預算案建議書建議大幅調高煙草稅，除咗要保障市民健康，協助政府某程度增加稅收，亦係一個考慮因素。去年嘅加幅係31.5%，當時我質疑係咪力度不足呢？尤其同2009年嘅增加50%，以及2001年嘅41.5%作比較。今年預算案再將稅率調高31.92%，係首次連續兩年加煙稅，兩年累積加幅達到約73.5%，相信可以對控煙起到一定嘅效力。

不過，即使連續兩年加稅，現時嘅煙草稅款佔香煙零售價，仍然略低於世衞建議嘅最少75%。我同其他支持禁煙嘅人士都提過，係咪可以引入一個自動調節嘅機制，確保煙草稅佔香煙零售價比例，可以持續維持喺不少於75%嘅一定水平，唔會受到煙草商因各種原因調整定價，而對有關百分比有影響。

我唔肯定有關做法，會否有違《基本法》內有關稅收建議必須經立法會審批嘅規定，亦有可能政府會覺得，每隔一段時間，花啲人力物力同資源，嚟到立法會尋求修例調高煙稅，所產生嘅宣傳同教育效果會更大，所以希望局長可以回應一下。

好多社會人士同議員都擔心，加煙稅會否加劇私煙問題，最後未必達到預期嘅效果，反而係幫咗啲不法份子增加收入。我喺去年發言亦有提及，包括批評當局未有針對購買私煙嘅行為做好執法同宣傳，令唔少市民覺得買私煙唔係乜嘢嚴重嘅事情。

我理解政府近年係有加強執法打擊私煙活動，包括從源頭、零售、以至市民違法購買私煙嘅層面。我亦都睇到海關嘅最新宣傳片，有特別強調買私煙係犯法嘅，都係會畀人拉嘅，但係正好多議員提出，政府仍有提升效果嘅空間，希望當局喺呢方面能繼續努力。

我去年亦提到，加稅只係其中一種控煙手法，要有效咁進一步降低香港嘅吸煙率同減少二手煙嘅禍害，政府必須多管齊下。政府去年7月發表名為《活力健康、無煙香港》嘅諮詢文件，建議透過管控供求、禁制宣傳、擴大禁區，以及加強教育同戒煙服務四大範疇策略，全方位加強控煙，大部分建議我都係支持嘅。當中亦有提到我一直倡議，將現時不斷擴大禁煙範圍嘅做法，改為實行「指定吸煙區」嘅政策。

諮詢期過咗大半年，當局至今未有公布詳細結果同下一步嘅工作計劃。我明白部分建議喺執行上可能會遇到唔少困難同阻力，例如英國早前提出嘅「無煙世代」呢個建議，通過立法禁止向某個日子或之後出生嘅人販賣香煙，就遭到煙草商同部分人權份子大力反對。我倡議嘅「指定吸煙區」嘅做法，亦肯定會引起唔少煙民嘅不滿。經過實施垃圾收費引發嘅爭議，部分官員可能嚇怕咗。

我希望政府唔會遇難避事或者半途而廢，各項控煙措施，唔係一定需要一次過就全面實施，可以分階段推出同試行。例如設立一定數量嘅「指定吸煙區」，其他公眾地方全面禁止吸煙嘅做法，喺現有市區可能搵唔到足夠合適嘅地方，因此我向來都建議先喺一啲新發展區試行，例如部分仲做緊詳細規劃同設計嘅北部都會區嘅新發展區。但政府遲遲唔訂出政策，相關規劃及工程部門就唔會等你哋，實施機會可能就會錯過咗。所以希望局長可以喺呢方面，快速咁考慮。

本人謹此陳詞，支持《2024年應課稅品(修訂)條例草案》嘅二讀同三讀。