20241211《2024年消防安全(建築物)(修訂)條例草案》二讀發言

主席，香港嘅樓宇老化問題正在急速惡化，由於香港嘅建築安全標準較高，加上相關業界同專業人士嘅努力，舊樓因失修而出現倒塌風險嘅情況極少，但因為各類違法改建，不當使用，缺乏適當維修保養，而出現消防安全風險嘅樓宇就比較普遍，威脅數以十萬計舊樓居民嘅生命同財產安全，每隔一段時間就會發生奪去多條人命嘅舊樓大火，呢啲係完全不可接受嘅。

今次修例建議，早於2021年初由上一屆政府提出，觸發點係2020年底發生嘅油麻地唐樓大火，該場火災一共奪去8條人命。因為種種原因同程序，草案直至今年7月先至正式提交立法會首讀，相隔咗3年半嘅時間，期間香港又發生咗多宗致命嘅舊樓火警，包括造成5死逾40人傷嘅佐敦華豐大廈大火，情況係極之不理想。

所以，我喺當選條例草案委員會主席之後，立即就要求政府同秘書處快馬加鞭，追時間，喺立法會大會休會期間開咗3次會議，包括一場有多位專業人士同地區代表出席嘅公聽會，以便盡早審議法案。喺呢度我再次感謝各名委員、官員、秘書處人員嘅支持同配合，促成草案可以喺今年之內完成審議，恢復二讀同三讀，並喺法例刊憲後即時開始實施。

草案嘅主要內容同討論，剛才我已喺法案委員會主席發言中交代，嚟緊我會集中講3個核心問題。

第一係今次修例可能帶嚟嘅道德風險同反效果。草案原意係協助一啲願意守法合規，有心提升大廈消防安全，但因為種種理由，令佢哋無法有效咁展開相關改善工程嘅業主。當中包括一啲「三無大廈」同「殭屍法團大廈」，以及一啲業主之間有唔同利益及意見，涉及好多長者同失聯業主嘅舊樓等等。呢類樓宇無論政府點樣加強宣傳、支援同執法，再等多十年八年都唔會有成果，有必要由政府介入，代辦工程，然後再向相關業主追收番所需嘅費用。

不過亦有人擔心，當草案獲本會三讀通過，政府有權代舊樓業主辦理消防工程，有啲原本仲努力緊、嘗試緊自行籌組相關工程嘅大廈同業主，會唔會出現立即放軟手腳，等待政府進場，甚至連最基本嘅消防設施保養都唔做，令大廈嘅消防風險愈高就愈好，藉此逼使政府優先幫佢哋進行改善，最後可能反而令香港整體嘅舊樓消防問題惡化。

政府必須正視有關問題，包括聯同各區民政處、關愛隊同區議員等等，做好相關嘅法例宣傳同澄清工作，促使相關大廈盡早進行必要嘅消防改善工程。對一啲明明有力而無心，罔顧住客安危嘅業主，要加快同加強檢控；對一啲有心但力度不足嘅業主，需要加強支援，促成佢哋順利自行展開所需嘅改善工程，而唔係寄望由政府代辦。當中支援嘅方法唔一定係提供財政資助，更重要嘅往往係技術上、專業上嘅支援。

香港有唔少舊樓業主其實唔係冇錢，而係好擔心會畀人呃錢，例如圍標問題，又或者工程開展咗，承建商先至話呢度又要加錢，嗰度又要改嘢，好似無底深潭咁，整極都整唔完。呢方面帶到我想講嘅第二個問題，就係如何善用專業服務同市場嘅力量。

唔少舊樓居民會期望，今次修例通過之後，好快就會有政府工程人員上門幫佢哋維修各類消防設施。但根據政府表示，初期每年可能只會為十幢左右嘅樓宇進行代辦工程，相對於全港數以百計、甚至上千幢有較高消防風險嘅舊樓，絕對係杯水車薪。原因包括相關部門嘅人手問題，當局亦關注如果一下子展開大量代辦工程，私人業界嘅承受能力，同時會否因而搶高咗有關工程造價。

其實只要政府進一步善用專業，增加外判，尤其係負責設計及監督相關工程嘅顧問工作，相信就能夠更快、更有效咁協助更多舊樓，進行由政府代辦或業主自行開展嘅消防工程。

我代表嘅建築及測量業界，係好樂意幫手嘅。尤其是依家市道欠佳，全新嘅樓宇建築項目少咗，更多人願意參與舊樓嘅改建、維修同檢測工作。過往大家都擔心圍標問題，唔想同一啲不法之徒同流合污，甚至不必要咁受到不公平嘅競爭，有啲人因而嚇怕咗，但如果係同政府做就放心得多。關鍵係相關部門嘅前線人員能夠善用同信任專業，切實咁精簡各類審批程序，提速提效，做好「促進者」嘅角色，而唔係只顧做「監管者」。

最後一個問題，係有關商住混合樓宇嘅消防安全責任。之前提到嘅油麻地唐樓大火同華豐大廈火災，都係商住混合樓宇，引起火警同造成多人死傷嘅原因，或多或少都涉及餐廳、賓館，同大量違規劏房嘅經營。當局喺審批有關商業處所牌照時，往往只會關注有關單位係咪已符合相關法規同發牌條件，未必會考慮其所在大樓嘅公用地方係咪都符合各類安全法規，以及同一幢大廈係咪適合有大量同類嘅營運處所存在。

華豐大廈大火之後，政府已表明將來喺審批賓館牌照申請時，會一併考慮有關問題，藉此逼使呢啲賓館業主同經營者，有一個誘因及責任去同大廈內嘅其他業主，共同改善公用地方嘅消防安全。

嚟緊房屋局將立法規管分間出租單位，將一啲唔符合安全同基本居住標準嘅劣質劏房，提升為合規嘅「簡樸房」，唔達標嘅就會逐步取締。有業界人士提出，當局將來審批「簡樸房」嘅申請時，除咗單位本身，係咪都應該考慮其所在樓宇嘅公用地方情況呢？以促使相關業主協助改善整幢大廈嘅消防安全，更好咁保障佢哋嘅租客及其他住戶嘅生命同財產。

主席，本人謹此陳詞，支持《2024年消防安全(建築物)(修訂)條例草案》二讀。