20241218《建造業付款保障條例草案》二讀發言

主席，今日恢復二讀嘅《建造業付款保障條例草案》，喺業界已討論多年。觸發點之一係09年嘅金融海嘯，多間承建商、分判商，以至私人建造項目嘅業主都遇到現金流問題，出現層層拖數，唔少地盤工人有汗出、冇糧出嘅情況。建造業界同勞工界因而要求香港效法英國、澳洲及新加坡等地，訂立法定嘅建造業付款保障制度。發展局喺2012年10月成立工作小組研究相關立法，而12年10月，正係我首次宣誓就任立法會議員嘅日子，眨下眼就過咗12年嘞。

根據局長喺今年5月動議草案二讀時嘅發言，草案目的係改善建造業各持份者之間、存在已久嘅合約拖延付款情況，通過改善建造工程及供應合約嘅付款條文、訂立可快速解決付款爭議嘅審裁機制，以及引入承建商或分判商有權暫停或減慢工程進度嘅程序等，希望可減少業界出現公司拖數同工人欠薪問題。有關大原則，我同我代表嘅業界都係支持嘅，但對於草案建議嘅具體做法同條文細節，業界亦有一啲不同意見。

草案其中一項主要建議，係禁止喺建造工程及採購合約內，包含「先收款、後付款」或者「有條件付款」嘅條文，杜絕現時不時會出現，以上家未畀錢，作為唔找數畀下家嘅理由。當然，如果上家走咗佬，或者破咗產，真係有可能一時間唔夠錢找數畀下家。

尤其依家經濟不景，市況欠佳，息口高企，唔少業界公司都正在艱苦經營，草案內有關付款時限、強制審裁同暫停工程嘅規定，唔少人都擔心，會否加劇咗部分公司面對嘅現金流問題呢？想獲取銀行貸款會否更困難呢？當合約鏈當中有其中一間公司因某種原因破產倒閉，觸發某一方啟動審裁或停工機制，會否引致合約鏈內其他公司出現骨牌式、滾雪球式嘅倒閉潮呢？如果真係發生呢種情況，唔單止相關工程項目會大幅延誤、甚至爛尾，亦會導致更多公司、更多工人收唔番應得嘅款項，與立法嘅原意背道而馳。

喺英國同愛爾蘭嘅建造業付款保障制度，係有特別針對呢種情況作出規定，訂明如果涉及有公司破產，「先收款、後付款」嘅做法便可獲接受。但政府認為有關問題牽涉《公司條例》與破產拯救問題，唔應該喺呢條草案處理。部分業界對此係失望嘅，我促請政府起碼應該更積極同主動咁，喺相關情況下提供適切協助，緩解有關問題。

草案嘅另一建議，係如果上家未有依法、依時付款，下家喺給予業主5日書面通知後，便有權暫停或減慢工作。有關做法原意都係合理嘅，並且可以讓最緊張工程進度嘅業主及早知情，採取有效同合適嘅方法措施，從而促使各方可以復工。但亦有業界擔心停工機制會否遭到濫用，例如因為唔夠工人同資金，以至係出現工業意外或工程質量問題等等，導致項目進度落後，就貿然啟動審裁及停工程序，藉此拖延時間或將工程延誤嘅責任推畀其他人。

政府強調，會喺稍後制訂嘅「審裁規則」同「實務指引」制訂防止濫用條款，包括授權審裁員指令提出無理申索嘅一方支付全數審裁費用。另外，業界亦擔心審裁員嘅資格，包括係咪有足夠嘅專業知識同經驗，喺指定時間之內作出有關裁定。審裁員嘅質素、人手等問題，我留待審議修正案階段再討論。

主席，雖然我剛才表達咗業界對今次立法嘅部分憂慮，但總體嚟講我同業界都係支持嘅，希望藉此減少業內嘅拖數陋習，使各方都可以喺合理時間內取得應得報酬。但正如本會喺去年通過嘅職安健修訂條例顯示，單靠立法去規管、告人、罰人，未必係唯一同埋最有效嘅方法，更重要係行業文化同心態上嘅改變，以及政府要提供適切嘅指引同支援。

就建造業界嘅付款及拖數問題，首要係政府做好榜樣，唔好拖數。不少業界人士都反映，政府同公營機構嘅工程及顧問項目，都不時有拖數情況出現，原因係相關嘅驗收、審批及付款程序過於繁複冗長。業界做完應做嘅工作，往往要等幾個月甚至更長時間，相關部門先至批到錢找數，令承建商及顧問公司面對嚴峻嘅現金流壓力。尤其現時經濟環境唔明朗，私人項目大幅減少之下，我係擔心會導致更多建造公司倒閉，希望政府正視有關問題。

主席，喺新冠疫情期間，我要求政府向業界加快、加密付款，同提高預支工程費嘅比率。發展局及其下嘅工程部門係有做嘅，對此我再次表示感謝，但其他部門、大部分公營機構都冇跟嘅。又或者管理層已作出咗指示，但未能上情下達，喺前線做審批嘅同事冇全心加快處理，用種種理由繼續歎慢板，未能做出應有嘅成效。我希望局長再努力啲，推動埋其他部門、庫務科，以至使用公帑做工程項目嘅公營及資助機構，一同加快相關嘅付款程序，繼而帶動私營企業都一樣咁做。

除咗付款程序，政府亦要持續優化各部門同公營機構嘅招標採購制度，以減少「價低得者」嘅比重。近年業界出現嘅拖數以至清盤問題，或多或少同早幾年疫情時嘅割喉式競爭有關，出現咗唔少明顯不合理嘅低標價。最近市況唔好，割喉式競爭可能又再出現，惡果可能幾年後會浮現。

最後，業界希望政府可以維持穩定、足夠、同多元化嘅工程及顧問工作量，尤其係中小型公司有份參與嘅項目，避免喺某一時段內，過於集中只有某幾類嘅公司、某幾種嘅工程先至有嘢做。我一直支持政府唔好因為一時嘅經濟同財政問題，而大幅減慢推展各類基建工程同發展計劃，否則對業界、對工人、對香港經濟及長遠發展都會帶嚟嚴重後果。本人謹此陳詞，支持草案二讀。