20250611《2025年建築物能源效益(修訂)條例草案》二讀發言

主席，香港出名多高樓大廈，大廈裡面嘅電梯、冷氣、照明等設施系統，全部都會耗用能源，製造碳排放。據統計，香港有超過一半嘅碳排放，係嚟自與建築物耗能相關嘅電力生產。故此，政府早喺1998年已推出自願性嘅計劃，推動各類型建築物提升能源效益，從而減少耗電量同碳排放。

到2012年，政府訂立《建築物能源效益條例》，強制13類嘅建築物喺新建或進行主要裝修工程時，其屋宇裝備必須符合由機電署制訂嘅能源效益標準。當中商業建築物同綜合用途樓宇內嘅商業部分，更最少每隔10年就要進行一次能源審核，以確保佢哋嘅耗能表現唔會隨時間而變差，會根據最新嘅科技同環保標準，與時俱進。

為咗進一步促進節能減排，以期達致喺2050年之前，將商業樓宇用電量減少3至4成，以及將住宅樓宇用電量減少2至3成嘅目標，除咗提升相關耗能設施同器材產品嘅能源效益，環境及生態局制訂咗現正恢復二讀嘅《2025年建築物能源效益(修訂)條例草案》，將需要符合能源效益標準嘅建築物種類增至15種，新加咗主要用作數據中心嘅物業，以及工業大廈內嘅用作數據中心用途嘅部分。

主要考慮原因係數據中心嘅用電量，比一般工商物業多好幾倍，甚至上十倍。香港近年積極發展創新科技，尤其係大數據及人工智能AI，對數據中心嘅需求愈嚟愈大。將有關建築物納入規管範圍，對香港整體嘅節能減排工作係非常重要嘅。

草案另一建議，係將需要定期進行能源審核嘅建築物類別，由現時嘅兩種大幅增加至11種；以及將新建成或新改裝大廈需要進行能源審核嘅頻率，由過往最少10年一次，加密至最少5年一次。數據顯示，喺條例實施後，進行過第二次能源審核嘅建築物，其能源使用指數比起第一次審核，平均下降咗約2成，效果顯著。

草案亦授權政府當局，喺網頁公開各幢建築物嘅部分能源審核結果，好讓市民大眾、尤其係物業嘅現有及潛在用戶，清楚知道邊幢大廈嘅能源效益高啲，有助減少電費支出。

喺草案審議期間，有建議政府效法現時嘅電器產品能源效益標籤制度，為不同類型嘅建築物制訂清晰、易明嘅能源效益級別，令耗能表現較佳嘅物業，可以藉此提升品牌效應，促使更多用戶或潛在用戶知悉，有利加強企業嘅ESG表現。

主席，現行嘅《建築物能源效益條例》，僅規管新建成同新裝修嘅建築物，但舊有建築物始終係佔絕大部分。如果推動到類似嘅能源效益標籤或分級制度，將有助吸引更多業主、包括現有建築物嘅業主，自發性提升其下物業嘅能源效益，有助實現減排目標，希望政府能將有關建議盡早落實。

此外，多位議員亦關注到，增加咗需要進行能源審核嘅建築物類別，同加密審核頻率，市場係咪有足夠人手提供相關服務，會否因而拉高咗收費水平同完成法定審核嘅時間。就此，草案建議增加合資格成為「註冊能源效益評核人」嘅專業人員類別，以增加人手供應。根據過往經驗，進行一次能源審核，開支一般界乎2萬至10萬元，與整幢建築物可節省到嘅電費支出比較，我相信有關費用係可以接受嘅。

喺法案審議期間，我同多位議員都質疑，草案原先對「數據中心」嘅釋義太過籠統，可能會令一般大廈內嘅擺放伺服器嘅地方，以至係純粹用嚟儲存電腦、電子產品嘅倉庫，都跌入咗有關定義。政府從善如流，採納咗議員嘅意見，稍後會由局長提出修正案，加以釐清及收窄「數據中心」嘅釋義，避免出現一啲「誤中副車」嘅情況。

最後，草案訂明政府部門首長可以以國家安全為理由，以書面方式向機電署署長提出，豁免為指明嘅建築物進行能源審計。但係如果有關建築物嘅用途等情況有所改變，相關國家安全理由已不再適用，係咪有機制適時解除豁免呢？政府考慮後決定提出修訂，訂明相關部門首長有責任喺有關豁免不再適用後主動通知署長，並喺解禁後12個月內，為有關建築物重新進行能源審核。有關修正案我亦係支持嘅。

本人謹此陳詞，支持草案二讀同三讀。