20250709「動態規劃及整合土地，加快北都大學教育城發展」議案

主席，我聯同G19議員上周五與行政長官會面，就《2025年施政報告》提交建議。無論喺G19嘅共同倡議，定係我個人嘅施政報告建議書，都提到香港應大力發展教育產業，將今屆政府提出嘅「留學香港」品牌，進一步提升為「留學經濟」，並藉此帶動、同加快整個北都嘅發展及建設。

北都嘅產業發展，好多人都關注創新科技，呢方面固然要加快追落後，但始終要啲時間先會見到成效。反觀發展教育產業，香港已具備一定優勢，好多議員都提到，香港擁有5間世界排名百強嘅大學，仲有最近美國特朗普政府，對當地多間大學同海外留學生嘅無理打壓，都為香港作為國際教育樞紐、以及北都大學教育城嘅發展帶來額外嘅機遇。

正如周文港議員嘅修正案指出，發展教育產業同北都大學城，吸引更多高端學生、學者同科研人員來港，對香港嘅整體創科發展，以至其他產業都會帶嚟益處，所以唔需要擔心會因而削弱咗創科方面嘅發展。

喺香港要推動教育產業，同發展其他行業一樣，都需要足夠嘅土地，用作興建校舍及科研等設施，以及修正案特別提到嘅，將科研成果商品化所需要嘅土地。早喺北都發展策略提出之前，其實我已提議研究將部分現有嘅大學校舍，遷往新界以至當時講緊嘅中部水域人工島；一來容許大學有更大擴展空間，增加收生同更新設施；二來亦可騰空現有嘅用地，作其他更合適同具經濟效益嘅用途。

政府喺北都預留咗約90公頃土地，作為發展大學教育城，但好多市民同議員都質疑夠唔夠，畀得現有嘅本地大學擴建或搬遷，就唔夠地方用作吸引海內外嘅一流大學進駐。唔計面積最大、超過100公頃嘅中大，單係科大現時已佔地約60公頃、港大係53公頃，相對較細嘅城大亦有15.6公頃，90公頃夠邊個用呢？而且該90公頃土地分散喺3個發展區，發揮唔到規模效應，不利跨院校嘅協作同共享設施。好高興發展局長同教育局長表示會研究呢方面，我認為更需要提高規劃嘅彈性

另外，提供足夠土地作宿舍用途亦非常重要。香港住屋租金高昂，對吸引外來學生及學者、專家做成障礙。發展局早前提出先導計劃，鼓勵商廈與酒店改裝做學生宿舍，係一個多贏方案，值得支持。

原議案提出嘅「學研產居」概念，我亦相當支持。除咗留學生，外來嘅學者、科研人員，以至剛剛喺本地大學畢業，有意繼續留喺香港發展嘅人才，政府都要考慮如何照顧佢哋嘅住屋需求。否則佢哋唔會留得長，畢完業就走，幫唔到香港嘅長遠發展，達唔到將人口結構年輕化嘅目標。

除咗大學，香港亦有唔少國內外知名嘅中學，我認為可參考一啲西方國家嘅做法，將教育產業擴展至中學層面，希望政府能多加考慮。本人謹此陳詞，支持原議案及兩項修正案。