20250716「檢視工務工程優先次序，確保重點項目提速提效」議案

主席，政府嘅工務工程，並非單純嘅公共開支，而係對香港未來發展至為重要嘅投資。包括可創造大量就業，單計建造業界就有超過30萬從業員，連同佢哋嘅家人，養活超過100萬人。長遠嚟講，工務工程建成嘅新發展區、基礎設施、樓宇房屋同各類公共建設，為香港帶嚟持續嘅經濟同民生回報，帶動其他多個行業發展及不同嘅經濟活動。

故此，我同建測規園界一直強調，政府唔應該因為一時嘅經濟情況同財赤問題，而減少投資未來。相反，喺唔少國家同地區，遇上經濟不景、私人市場放緩嘅時候，政府反而會加大基建投資，加推工程項目，以避免整體經濟螺旋式咁樣收縮，對就業同消費造成進一步嘅打擊。呢個亦係特區政府喺本年度預算案提出，將未來幾年嘅基本工程開支，由去年嘅約900億元，增加至平均每年約1200億元嘅考慮因素之一。

工程開支增加嘅另一主要原因，係北部都會區嘅發展陸續進入實質嘅建設階段，唔再停留喺策略同規劃概念嘅階段。北都發展對香港嘅重要性不言而喻，立法會一連兩個星期，辯論咗兩項有關北都發展嘅議員議案，其中一項係由民建聯嘅劉國勳議員提出，另一項佢亦有提出修訂，兩者都係要求政府提速提效，發展北都，並得到絕大多數議員支持下通過。

對於同屬民建聯嘅陳克勤議員今日提出嘅議案，包括標題同大部分內容，好似「檢視工務工程優先次序，確保重點項目提速提效」，務求「盡早為香港經濟及民生帶來正面效益」等，我係認同嘅。

然而，原議案提及嘅「考慮押後非急迫項目」，唔少人可能會解讀為減少工務工程同所需嘅資源，與民生開支似乎有對立嘅意思。因而我決定提出修正案，修改有關字眼，並重申政府應維持基本工程開支平均每年約1200億元水平嘅承諾。

至於盧偉國議員同張欣宇議嘅修正案，同我嘅修訂亦係一脈相承。前者強調工務工程對提振經濟同改善民生嘅貢獻，政府應設法防止工程量大起大落，以確保香港嘅持續發展及保障建造業從業員嘅就業機會。後者亦要求政府維持每年工務工程嘅投入總規模。兩項修正案我都會支持，如果獲得通過，我會撤回我嘅修訂。

至於何敬康議員嘅修正案，提到本地嘅顧問研究費用上升，明顯係與現實情況不符。事實係受到經濟及樓市放緩影響，本港嘅私人發展項目及工程量大幅減少，顧問合約投標價出現割喉式嘅惡性競爭，好多業界公司都面臨困境，要減薪、裁員，甚至面臨結業，所以我係唔會認同有關修訂。主席，本人謹此陳詞。