20250724「關注中產養老需求，構建高質量康養生態體系」議案

主席，首先感謝G19嘅陳沛良議員，提出今日嘅「關注中產養老需求，構建高質量康養生態體系」議案，以及兩項來自G19議員嘅修正案，反映我哋對香港嘅安老、養老工作，如何應對人口高齡化嘅關注。

香港對何謂「中產」並冇官方定義，過去嘅貧窮線只睇收入水平，導致好多退休人士因為冇恆常收入，而被列作貧窮人口。但其實唔少香港長者都擁有一定資產，包括物業。以往好多長者都希望將物業等資產留畀下一代，並寄望仔女會照顧自己，但有關情況近年已出現咗轉變。其一係愈嚟愈多長者即使有仔女，唔少可能已經移咗民，又或者一早已靠自己努力或「靠父幹」而擁有物業，唔會寄望父母將物業留畀佢哋。

因此，如何善用長者擁有嘅物業等資產，轉化成穩定嘅收入以應付日常開支，鼓勵市民喺年輕時及早做好退休後嘅財務同生活規劃，這對於提升長者喺退休後嘅生活質素，促進整體消費同發展銀髮經濟，以至減輕政府嘅社福及醫療開支負擔等，都係至為重要。

政府聯同按揭證券公司近年推動嘅「退休三寶」，即係香港年金計劃、安老按揭計劃、同保單逆按計劃，仲有「三寶」以外嘅醫療保險，都有助達致上述目的，促進中產養老。唔少市民依家都UP得出呢幾個名，但真正了解同參與嘅唔多。政府同業界如何再加強推廣，係咪可以提供更多稅務優惠，能否進一步善用打工仔嘅強積金作相關養老投資等等，陳沛良議員、李惟宏議員同譚岳衡議員都係相關界別嘅專家，我無謂班門弄斧。

講番我較熟悉嘅建築及房地產。政府剛於尋日公布我倡議多年嘅「長者友善樓宇設計」及相關認證計劃。房協近年亦推出咗多個包含安老照顧服務嘅長者屋項目，賣嘅同租嘅都有，售價及租金都唔算平，但我理解都係非常受歡迎，反映市場有足夠需求同消費力。但相關單位供應都係比較少，尤其是私人發展商對於呢類要提供長遠服務承擔嘅居住項目，仍然不太熱衷，未能配合居家安老嘅目標。

我喺2016年發表嘅「長者適切居所及相關配套研究工作小組」報告，除咗提出要制訂相關樓宇設計標準，亦強調要提供一定誘因，以鼓勵發展商興建更多長者適切居所，希望政府會積極考慮。

香港嘅住屋又貴又細，因此愈來愈多港人選擇北上養老，政府應該繼續喺各方面提供利便，但亦有好多中產長者希望繼續喺香港生活。雖然本港都有少量以中產長者為對象嘅優質安老院舍，部分係由一啲有心人經營，唔係純粹為咗賺錢，但亦面對地價及建築費高昂、部門審批繁複冗長、以及護理人手短缺等問題，難以大量增加供應。希望政府能加強支援，為中產長者留港生活提供更多選擇。本人謹此陳詞。