20250910《同性伴侶關係登記條例草案》二讀發言

主席，我對一夫一妻、一男一女嘅婚姻制度係完全支持嘅。之前喺不同場合我已多番指出，人權同自由嘅保障，並非完全沒有限制。個人嘅生活可以有唔同嘅選擇，前提係唔能夠影響他人嘅人權自由，以及做出一啲破壞社會道德倫理嘅行為。就此，政府喺政策同法律上，對於一啲有違道德倫理嘅行為，例如係將同性婚姻合法化，係唔應該支持嘅。

終審法院喺岑子杰案嘅判詞已清楚指出，根據《基本法》同《香港人權法案》，同性伴侶喺香港並不享有同性婚姻嘅憲法權利。終審法院並裁定，喺外地註冊嘅所謂「同性婚姻」，喺香港亦係不會獲得法律承認。

然而，終審法院同時宣告，特區政府未有按香港人權法履行其積極義務，去確立一個替代框架，以訂定同性伴侶嘅適當權利同責任，呢個正係今日恢復二讀嘅《同性伴侶關係登記條例草案》嘅由來。

對於條例草案我係支持嘅，因為草案充分體現咗對法治、人權、同社會多元價值嘅尊重與包容。終審法院嘅判決明確指出，香港需要喺法律層面承認對同性伴侶關係嘅某些保障。政府採納判決，並喺兩年限期內提出立法方案，體現咗香港法治社會嘅成熟同政府嘅擔當。

同時，我哋必須認識到，《基本法》第37條規定受到保障嘅婚姻，限於一男一女嘅自願結合，呢個原則係香港社會嘅家庭價值基石。政府嘅替代方案，正係喺尊重呢個原則嘅前提下，尋求對同性伴侶權益嘅合理保障。政府方案並非要改變現行嘅婚姻制度，而係為同性伴侶提供好似醫療決策、殯葬處理等基本法律保障。有關做法既符合終院判決嘅精神，亦都維護咗獲《基本法》確立嘅婚姻制度，喺保障人權自由與維護社會嘅婚姻觀念之間取得平衡，希望能夠促進社會嘅包容與共融。

不過我亦想指出，無論條例草案今日能否獲得立法會通過，都唔代表相關嘅人士同組織，會就此放棄爭取更多嘅權利同保障。

最後，我希望社會各界能夠以理性、包容嘅態度，共同推動香港朝着更加公平、平等嘅社會邁進，堅守法治精神，同時捍衛正確嘅家庭同婚姻價值，積極守護一夫一妻、一男一女嘅婚姻制度。主席，本人謹此陳詞，支持條例草案。