20251008施政報告致謝議案發言(二)

主席，去年7月，我提出我今屆任期嘅第3項議員議案，內容包括促請政府改革香港嘅土地規劃同批租制度。今年7月，我向特首提交嘅2025施政報告建議書，再次提出呢兩項改革建議，藉此加快北部都會區嘅發展同建設。好高興我嘅大部分建議，均已獲特首採用並納入今年嘅施政報告。

北都發展對香港嘅重要性已毋須多講，要提速提效，必須以新思維同新手法去推動，重要一環係促使更多私營企業及投資者嘅參與。施政報告提出成立特首擔任主席嘅「北都發展委員會」，並下設三個專組，目的如何加快、加強相關嘅政策創新同跨部門協調，並針對各個發展區制訂不同嘅公私營合作模式同融資方案，包括股份制、債券、政府注資及「土地參股」等，以吸引更多私營資源參與，係非常值得支持。

此外，政府亦會為就北都發展引入靈活批撥土地、多元開發模式、以及嶄新發展方案等多種新思維。除咗傳統嘅公開招標，亦可以推行限制性招標、以至直接批地等。開發模式方面，將參考內地「1.5開發」嘅概念，以試點形式進行「分階段開發」。

相關建議不少都與我同我代表嘅業界概念相同，值得支持。但要將呢啲新思維、新做法迅速有效咁落實，關鍵係要改變部分部門同官員，往往只重監管、不擅促進，重視程序、但忽略成果嘅處事心態。我期望有關改革可以同報告提出嘅「部門首長責任制」同強化公務員評核機制有機結合，以推動全體公務員齊心加快發展北都，使到特首毋須再心急如焚。

有人擔心直接批地模式會否產生利益及公平問題，我認為政府唔應該好似過去一段時間咁，因為一啲冇事實根據嘅所謂「官商勾結」指控而削足就履，對一啲有利香港整體長遠利益發展嘅事情議而不決，重點係要提高相關決策嘅透明度，向公眾同立法會清楚解說以不同模式批地嘅項目內容、理據同好處等。

另外，施政報告提出成立由政務司司長領導嘅「大學城籌劃及建設組」，強調要將教育、科技及人才一體化發展，回應咗我同G19提出，要加大力度發展「留學經濟」，以及通過加快大學城建設，嚟推動整個北都發展嘅倡議。

主席，我向來都認為土地嘅其中一項重要功能，係推動產業同經濟嘅發展。至於應該推動邊種產業，主要考慮係香港現時擁有、或者可以短期內創造嘅優勢，以吸引相關嘅產業同人才落戶。

香港擁有5所世界百強大學，再加上現時美國政府對當地大學同外國留學生嘅打壓，為香港嘅教育產業發展帶嚟更多優勢同機遇。但當局必須謹記北都大學城嘅建設，並非純粹為咗增加留學生嘅數目，更重要係配合不同創科項目及產業嘅發展。

主席，我要再次感謝特首喺施政報告提出，會喺原有嘅每年平均1,200億元基本工程支出之上，再額外預留300億元嘅開支，以應對本地及內地私人發展項目減少，對建造業界、尤其係專業顧問服務帶來嘅壓力。就如何善用呢300億元，我會促請建造業專業界別多提意見。

最後，我亦希望政府喺項目及資源分配方面，唔好只側重大公司，而忽略咗中小企，要讓到不同界別及規模嘅公司都有機會參與。本人謹此陳詞。