20251010施政報告致謝議案發言(四)

主席，除咗強化治理體系同提速提效推動發展之外，我亦一直關注香港嘅房屋政策，以及日趨嚴重嘅人口及樓宇「雙老化」問題。

隨着公私營房屋供應量顯著回升，公屋輪候時間有序回落，我多次促請政府，改變過去過份側重投放大量資源興建出租公屋，供基層市民租住嘅做法，而忽略咗點樣鼓勵及協助市民自置物業，促進居住環境向上流動，避免間接助長咗部分人、尤其係青年人嘅「躺平」心態，長期依賴政府資助，不謀上進嘅情況。

今年施政報告強調協助市民置業安居同豐富置業階梯，我係支持嘅。但報告建議提高綠表居屋比例、進一步放寬資助房屋嘅轉售及出租限制等，可能會令一啲從未享受任何公屋、居屋等房屋福利嘅市民更感不公，政府需要加以關注，作出平衡。

展望未來，政府應檢討沿用多年嘅房屋政策，提升至更高嘅層次，包括我倡議多年嘅制訂「人均居住面積」同「住屋開支佔家庭收入比例」目標，並致力達標，令市民有望住大啲、住鬆啲、住好啲。

喺應對舊區樓宇老化方面，好高興報告採納咗我同業界提出，利用新發展土地嚟推動市區重建嘅新思維、新做法，包括放寬地積比率轉移嘅安排，容許將重建項目未用盡嘅地積比跨區轉移到其他地區，以及適度咁提高7個有迫切重建需要嘅舊區嘅私人重建地積比。然而，要更有效咁增加市場嘅誘因，政府必須同時優化相關嘅審批時間，包括當中補地價嘅程序等等。

人口老化方面，今年施政報告提出成立「社會高齡化對策工作組」，由政務司副司長帶領各政策局制訂相關對策，除咗涵蓋安老、醫療、房屋、文化康樂同樂齡科技等，亦會加強推動銀髮經濟嘅發展，方向正確，值得大家支持。

最後，好高興見到今年施政報告，特別為「改善大廈管理」設有獨立嘅章節，提到會進一步擴展「聯廈聯管」計劃、檢視《建築物管理條例》、善用科技處理樓宇滲水同加強舊樓消防安全等等。報告亦首次提到物業管理業，喺支援居家安老長者及照顧者方面嘅角色，會推出計劃培訓前線物管人員，為有需要嘅照顧者提供協助。

主席，無論係樓宇嘅老化，定係人口嘅老化，專業嘅物管公司同物管從業員都可以扮演重要嘅角色，希望政府能夠重用、重視佢哋，並加強相關嘅培訓及支援。主席，本人謹此陳詞，支持施政報告致謝議案。