20251022「改革滲水問題處理機制」議案

主席，香港嘅舊樓老化及失修問題日趨嚴重，加上違規劏房及喉管亂駁問題，滲水個案時有發生。滲水辦喺2024年接獲超過47,000宗舉報，按年上升百分之五，同2022年比較更上升接近兩成。

滲水問題對受影響住戶往往構成好大困擾，相信唔少人都經歷過，好彩嘅話，樓上業主能理解同配合，找出源頭，從速處理，但過程都要花唔少時間，對日常生活構成一定影響。但好多市民未必咁好彩，懷疑係滲水源頭嘅物業業主或租戶，往往係闊佬懶理，管理處敲門唔睬，滲水辦要求上門調查又左推右推，入唔到屋，確定唔到源頭，部門就出唔到order，遲遲都解決唔到滲水問題。

2024年經滲水辦調查之後，成功搵到源頭嘅個案及發出嘅「妨礙事故通知」，只有5000多宗，僅佔同期嘅新舉報個案一成多啲，明顯係成效不彰，令到滲水辦成為最多市民同議員不滿嘅政部門之一。

我理解其實好多滲水辦同事同相關外判顧問公司，工作量同壓力都好大，仲成日畀人投訴，但因為相關法規同程序問題，加上權責不清，權力亦不足，難以強制入屋調查，屬於低科技嘅顏色水測試亦存在種種問題，以致未能快速處理。

今年施政報告提出，將優化處理樓宇滲水問題嘅檢測程序，利用科技以加快確定滲水情況及釐清責任誰屬，並會要求業主喺指定時間內自行檢查同糾正，否則政府會採取進一步行動同向其收回費用，以促使業主履行妥善保養物業嘅應有責任。當局亦會更積極咁，推動以調解方式解決住戶之間嘅爭議。有關建議非常值得支持，部分亦係由我哋建築測量同物業管理業界提出嘅，希望可以盡快實行。

原議案提出嘅6點建議，亦係值得支持，包括研究設立花紅制度，增加誘因，以鼓勵外判顧問公司提升服務質素同查找滲水源頭嘅成效。除咗顧問公司，如何促使滲水辦人員，建立更加重視效率同成果嘅文化，改變只着重走流程、嘆慢板嘅心態，亦同樣重要。

此外，我過去多次指出，政府應該更加重用專業物業管理公司，喺處理舊樓維修同緩解住戶糾紛方面嘅角色。事實上，當住戶發現滲水問題，第一個搵嘅往往唔係滲水辦，而係相關樓宇嘅物管公司。佢哋處理得好，滲水問題就可以快啲解決，滲水辦嘅工作量就有望減輕。

物業管理業監管局日前發布「處理物業滲水情況」及「處理冷氣機滴水問題」嘅良好作業指南，闡述物業業主同住戶嘅相關法定責任，以及物管公司協助處理相關事宜嘅程序。有指南當然係好事，但同時亦要加強對物管從業員嘅培訓及支援，希望政府同物監局能加倍努力，協助業戶解決滲水問題，切實排解民生憂難。主席，本人謹此陳詞，支持議案。