20251023「告別議案」發言

首先，我要感謝大主席梁君彥議員，喺過去兩屆立法會，帶領大家克服種種困難，有效、有序咁履行立法會職責，服務社會，取得亮麗成績。

同時，我亦要感謝各位來自不同政治光譜，代表不同界別嘅議員同事。喺過去多年，大家就政府政策、法案同撥款嘅認真審議，深入辯論，有時更會針鋒相對，但更多喺攜手合作。呢啲良性互動，都有助豐富有關政策、措施同法例內容，令相關工作更臻完善。

我喺2011年決定參選立法會，得到業界支持當選，轉眼間已有十多年。回首過去，我依然清晰地記得，第一次踏入莊嚴嘅立法會議事廳，當時嘅理想同情懷。

今屆立法會，我有幸參與《維護國家安全條例》，亦即《基本法》第23條嘅立法工作。喺法案委員會主席廖長江議員帶領下，深入、高效咁完成條例嘅審議，為特區履行憲制責任、維護國家安全、同香港嘅穩定出一分力。我亦參與咗立法會行政管理委員會嘅工作，先後擔心發展事務委員會主席、工務小組主席等，推動香港嘅發展規劃及各項工務工程嘅落實推展。

另外，我亦有幸成為立法會議員合作平台「G19」嘅召集人，匯集18位議員嘅智慧同力量，為政府施政同市民福祉出謀獻策。

主席，我深刻體會到，立法會嘅工作，每項法案及撥款建議嘅表決，從來都唔係非黑即白嘅簡單選擇，而係喺複雜嘅現實同多元嘅訴求當中，尋找最能符合公共利益、最能推動社會進步嘅平衡點。過程往往充滿挑戰，亦都別具意義。

作為立法會議員，服務市民，貢獻社會，係我畢生嘅莫大榮幸，呢段經歷亦係我人生中最寶貴嘅財富。在此，我要向所有支持我、信任我嘅市民、選民、業界人士、朋友、議辦團隊工作人員，以及最重要係我嘅家人，致以最深切嘅感謝！

天下無不散之筵席。隨着本屆議會結束，我嘅議事生涯亦畫上圓滿句號。離別之際，我衷心祝福大家。祝願大家係未來日子裡面，繼續以智慧同勇氣，為香港嘅繁榮穩定，為國家嘅富強昌盛，貢獻光和熱。

立法會嘅議事廳，呢段與各位共事嘅歲月，我將永遠珍藏於心。多謝！