[:zh]《2019年撥款條例草案》(2019至2020年度財政預算案)三讀發言[:]

[:zh]主席，我喺早前嘅二讀辯論中，已經講咗我對現屆政府嘅理財哲學、本年度預算案內嘅土地房屋措施，以及有關交通運輸、智慧城市建設、民生經濟等等方面嘅意見，依家我想講吓政府整體開支同資源分配。正如我喺預算案公布當日發出指出，今份預算案已兼顧咗發展與民生所需，但係喺拓展新機遇方面，力度可以再大一啲。

中美貿易戰發展反覆無常，近日形勢更加係急轉直下，原本以為可於幾日前達成協議，點知特朗普突然間又下令，向數以千億元計嘅中國貨品加徵關稅，中國其後亦推出反制措施。受到貿易戰影響，香港經濟喺去年第四季同今年第一季嘅表現，一季差過一季，依家睇嚟第二季嘅情況亦唔樂觀。

上述發展顯示，政府有需要喺《撥款條例草案》核准嘅五千多億元開支，多啲為香港開拓新市場同尋找新機遇，協助本港商界及專業人士把握「一帶一路」、東盟自貿區同粵港澳大灣區發展，減少對美國市場嘅依賴。

主席，連同其他基金帳目同債券償還，本年度嘅政府整體開支預算高達6,093億元，較上年度增加775億元，升幅為12.7%。當中近四分三屬經常性開支，其中教育、社會福利同醫療衞生開支佔咗約六成。而呢三大政策範圍嘅經常性開支，喺過去5年已累積上升咗45%。

好彩，由於政府預計本年度庫房可取得超過6,260億元嘅收入，整體而言仍會錄得輕微盈餘。呢啲收入喺邊度嚟嘅呢？我注意到除咗地價收入外，公司利得稅、印花稅、薪俸稅係主要來源，呢啲都係同香港嘅經濟活動息息相關嘅。

對於近年每一份財政預算案，唔少市民、傳媒、議員同政黨，最關注嘅係有幾多一次性派糖措施，甚至要求政府直接向市民派錢。不過，如果缺乏適當、適時嘅長遠經濟政策及基礎建設投資，為市民帶嚟更多就業機會、為企業帶嚟新嘅發展機遇、為政府帶嚟足夠嘅稅收，不論庫房現時有幾多嘅盈餘同儲備，都會有派晒、使晒嘅一日。到時要增加社會福利、改善醫療及教育，以及各式各樣嘅派糖及派錢訴求，都會淪為空談。

當中最好嘅例子就係回歸前嘅玫瑰園計劃，當年有人質疑該計劃會花光政府儲備，令庫房「使剩一個零頭」。但大家可以想像一下，如果依家冇咗赤鱲角新機場，仲係用緊啟德舊機場；如果冇咗三號幹線、冇咗西隧、冇咗西九龍填海區，香港嘅經濟同社會發展會變成點樣？

主席，我哋嘅資源並非無限嘅，必須善加利用，所以喺運用公帑，為各類建築工務工程及公共服務招標時，政府嘅採購政策不應太著重價低者得原則，因為有關做法提升唔到香港嘅建築工務工程質量及公共服務質素。同時，政府要盡量將工程及顧問合約拆細，讓中小型公司及年輕專業人士有機會參與。

政府亦應該喺不違反世貿規定下，做到某程度嘅本地優先，唔好過份迷信外國嘅名牌專家同顧問公司。佢哋除咗收費貴，往往亦因為不熟悉香港情況，而未有充分考慮相關設計嘅成本效益同係咪物有所值。我喺預算案諮詢時已反映過有關意見，希望司長喺政策同資源分配上跟進落實。

主席，本年僅此陳詞，支持將第1及第2條納入條例草案，以及支持《2019年撥款條例草案》三讀。[:]