[:zh]《2019年司法人員(延展退休年齡)(修訂)條例草案》二讀發言[:]

[:zh]主席，勞工及福利局局長羅致光講過，當大家嘅壽命都可以去到120歲，60歲就只算係中年。由於社會當時係爭論緊政府修訂領取長者綜援嘅年齡門檻，局長呢番話惹來唔少市民批評。但其實呢番話本身係有其道理，就算依家唔係完全準確，隨着醫學同科技不斷進步，市民愈嚟愈注重飲食、運動及個人健康，「60歲係中年」呢個說法，可能再過多一段時間就會成真。

面對人口高齡化、生育率低企、勞動人口減少等，全球多個國家同地區都已先後修改佢哋法定退休年齡，等上咗年紀，但身體仍然唔錯、有工作能力嘅市民，可以繼續從事各行各業、貢獻社會，同時令佢哋可以賺取一定收入，毋須單靠退休金或社會福利嚟維持生活。

香港並無強制性嘅法定退休年齡，但政府公務員、部分公營機構、私營企業，以及今日我哋討論嘅司法機構，就有為退休年齡作出限制。當中新入職嘅公務員退休年齡早前已經修訂咗，並設有機制容許部分現職公務員延遲退休。而公營機構亦陸續跟隨政府，作出相類似嘅改動。

依家恢復二讀嘅《2019年司法人員(延展退休年齡)(修訂)條例草案》，目的正係延長各級法院法官及司法人員嘅法定退休年齡。其中區域法院法官或以下司法人員嘅退休年齡，會由現時嘅60歲延長至65歲，喺有需要同符合某啲條件之下，仲可以進一步酌情延長至70歲先退休。至於高等法院或以上嘅法官，退休年齡亦會由現時嘅65歲延長至70或71歲，並可以再酌情延長至75或76歲。

主席，今次司法機構建議修例延長法官退休年齡，除咗係迎合人口高齡化嘅大趨勢，另一個目的係為咗紓緩法官人手不足嘅問題。

香港嘅法院除咗出名夠晒獨立，另一樣出名係審訊輪候時間長，非緊急案件往往要排期幾個月，甚至要超過一年之後先開審。亦有唔少案件喺審完之後，等一段頗長時間先至正式宣判，又或者法官經已口頭作出判決，但遲遲都出唔到書面判詞，影響與訟雙方就應否提出上訴或採取其他法律行動嘅決定。上述審訊遲、宣判遲同判詞遲嘅問題，原因之一正係根本唔夠法官做嘢。

好多法律界人士都講過，司法公義除咗要得到伸張同畀人睇得見，仲要喺合理時間內做到，否則都係有損法治同影響市民對整個司法制度嘅信心。

例如針對近月嘅連串違法暴力事件，有唔少市民都質疑點解有關當局拉咗人、告咗上法庭，但往往一上到庭就立即放番，案件排期排到幾個月後先至開審，令到部分涉嫌違法人士有機會再次犯案，亦導致部分人，尤其係青年人，誤以為自己即使犯咗法畀警察拉咗，只要畀幾百蚊保釋金就冇事。有人就提議香港效法英國，設立特別法庭統一及加快處理相關案件，以及收緊對保釋候審嘅規定。

此外，部分法庭同法官嘅量刑準則，疑似出現不一致嘅情況。好似喺早前宣判嘅一宗侮辱國旗案，被告僅獲輕判200小時社會服務令，但再之前有一位內地男子，用噴漆塗鴉美國駐港總領事館嘅外牆，就被判監禁4個星期，引起唔少市民關注同覺得唔公道，質疑係咪美國領事館幅外牆，比自己國家嘅國旗更值得保護呢？係咪因為犯案人係來自內地就要判重啲呢？

咁大嘅判刑落差，難免令人質疑當中係咪涉及法律以外嘅因素？係咪對唔同政治立場嘅人有唔同嘅對待？係咪只要被告年紀較輕、仲讀緊書，就必然可獲輕判呢？年紀大嘅、冇乜讀過書嘅，係咪就要重判呢？定係因為某啲被告有錢聘請較出名嘅律師同大律師辯護，就往往可獲輕判甚至當庭釋放呢？呢啲問題會唔會同法官嘅質素同人手有關呢？

主席，我可能講得太遠喇，講番法官人手短缺問題。司法機構近年已喺各級法院加開咗不少法官及司法人員職位，但問題係請唔到人、請唔夠人。根據司法機構提供嘅資料，截至今年3月底，各級法官及司法人員職位一共有218個，但實際人數卻只有156人，即係有成超過60個空缺，平均每4個位就有一個懸空，空缺率實在好高。

雪上加霜嘅係，根據現行嘅法定退休年齡，今明兩年會有成26名法官及司法人員退休，佔總數高達一成六。延長法官退休年齡，有助減少、或者延遲法官因退休而流失嘅問題。尤其呢啲都係較資深，有經驗嘅法官，留住佢哋對維持司法質素亦有幫助。

延長退休年齡亦會有助司法機構聘請新法官，因為好多司法職位，尤其係較高級別法院嘅法官，都可能係由做開私人執業嘅大律師同律師出任。佢哋如果係表現出色嘅，繼續私人執業所能賺取到收入一般都較高，起碼一定唔會畀做法官低，所以加入司法機構對佢哋嘅吸引力不大。

亦有部分情況係佢哋做到五十幾歲，希望轉變工作模式，考慮投身司法工作。不過，如果呢啲私人執業嘅法律界人士轉任法官之後，做得幾年又夠鐘退休，對佢哋吸引力又會大減。

尤其係區域法院及以上級別嘅法官，係規定唔能夠喺離職或退休後重投私人執業。如果佢哋知道喺放棄私人執業，轉職做法官之後，仲可以做多十年至二十年，咁樣佢哋投身司法工作嘅動力就會增加，喺機會成本方面嘅損失就會較少，對司法機構服務嘅時間亦會較長，對各方都係有利嘅。

主席，由於現時法官及司法人員嘅短缺情況非常嚴重，相信即使喺本會通過本條例草案，延長咗法官嘅法定退休年齡之後，法官人手不足情況仍然會存在，有關當局必須繼續研究其他方法加快增聘有質素嘅法官，吸引更多合適嘅法律界人投身司法工作，以及盡辦法縮短各級法院同各類型案件嘅輪候時間，令公義可以適時地得到彰顯，令犯咗法嘅人可以盡早得以審訊及受到應有的懲罰。

本人僅此陳詞。
[:]