[:zh]就延展「限聚令」審議限期之決議案發言[:]

[:zh]主席，依家我哋要討論嘅，係由陳凱欣議員提出，要求延長包括「限聚令」在內嘅多項防疫規例嘅審議限期，等立法會有多啲時間審議有關規例同防疫措施嘅內容細節。攬炒派威脅要否決呢項延展議案，主要目的係以便許智峯議員可以喺稍後提出另一項議案，要求廢除整條「限聚令」。

所以，喺講述我是否支持呢項延展議案同當中嘅考慮理據之前，我有需要簡單同大家重溫下有關「限聚令」嘅內容、背景、目的同實際發揮到嘅作用，以及一旦廢除之後可能出現嘅情況。

香港嘅2019年新型冠狀病毒疫情，喺今年3月初曾經一度減退，新增確診個案逐步回落，並曾經錄得兩日嘅零確診。不過，隨着疫情喺歐美地區大爆發，從有關國家，尤其係英國同美國「倒灌」番香港嘅輸入個案大增，繼而透過不同嘅本地社交活動感染其他市民，令香港嘅疫情迅速重新惡化，對公共醫療系統同有限嘅隔離檢疫設施構成沉重壓力。

為咗減少社交接觸，阻止疫情進一步擴散，特首會同行政會議喺3月27日通過制訂《預防及控制疾病(禁止羣組聚集)規例》，亦即俗稱嘅「限聚令」，以禁止市民喺公眾地方進行四人以上嘅羣組聚集，違者將會被處以罰款。

喺「限聚令」實施後，再加上進一步收緊入境限制等多項防疫抗疫措施，以及最重要、絕大部分市民嘅努力同自律，香港嘅疫情喺4月開始逐漸減退，早前更連續超過三個星期錄得零本地個案，累積確診個案維持係約一千多宗，死亡率更可能係全球最低。

相對於美國、歐洲，以至亞洲區內嘅日本同新加坡等，有數以萬計、甚至十萬計、百萬計嘅人民確診，奪去成千上萬條人命，其中包括唔少係醫護人員，香港嘅情況同表現實在已算非常唔錯，當中「限聚令」肯定係起咗一定作用。

隨着本地疫情逐漸受控，以及要平衡市民正常生活同各類經濟活動嘅需要，政府其後已多次放寬同取消部分防疫抗疫措施，包括將「限聚令」嘅聚集人數上限，由四個人增加到八個人。

因應上周出現咗數宗源頭未明嘅本地確診個案，政府日前宣布將「限聚令」再延長多兩個星期，有關決定係受到部分受影響嘅行業同商戶質疑嘅。但睇番多個近日急於放寬封城同居家令嘅歐美城市，確診及死亡數字隨即出現反彈。因此，我認為港府嘅做法係審慎嘅，係將市民嘅生命同健康放喺第一位，雖然咁做難免會對某啲行業同各階層市民嘅生計，造成進一步嘅負面影響。

所以，當我聽到許智峯議員計劃喺呢個時候提出議案，要求廢除整條「限聚令」，我真係以為自己聽錯，仲震驚過我聽到佢搶人手機嘅新聞。

我立即想到嘅係，美國總統特朗普為咗盡快重啟美國經濟，挽救佢每況愈下嘅連任選情，曾經公開呼籲支持者違反居家令，上街要求各個州政府放寬防疫措施。特朗普嘅做法遭到當地、以至全球嘅醫療衞生專家炮轟。許智峯等攬炒派議員，係咪響應特朗普嘅呼籲而作出今次行動呢？許議員到底係因為經濟理由而要求廢除「限聚令」，定係好似特朗普一樣，係基於政治考慮呢？呢個我唔清楚。

許議員質疑政府同警方透過「限聚令」蓄意打壓遊行示威活動、蓄意打壓「黃店」，以至蓄意阻撓六四燭光集會舉行，因此要立即廢除「限聚令」，以便攬炒派嘅支持者，包括一啲蒙面黑衣暴徒，可能重新喺街頭聚集、示威，繼而作出堵路、縱火等違法暴力行為；或者係喺商場內以唱歌、聽歌為名，滋擾、以至破壞嗰啲唔認同佢哋暴行嘅商舖，令到佢哋嘅生意喺疫情下雪上加霜，被迫執笠裁員。

無論呢個係咪攬炒派反對今日嘅延展議案，以及許智峯議員要求廢除「限聚令」嘅真正意圖，我想強調嘅係，喺疫情之下，病毒係唔會分黨派、唔會分政見嘅。唔會因為某啲人係為咗某類政治訴求而聚集，病毒就會對你網開一面，唔去感染你。

攬炒派一直高呼要香港全面封關，並且力撐部分醫護人員以罷工方式嚟表達訴求。如果「限聚令」真係喺今日就立即撤銷，導致香港疫情反彈，大量市民感染病毒，公共醫療系統崩潰，攬炒派對唔得對香港嘅醫護人員、對唔對得住全港市民呢？

基於上述原因，我係反對喺呢個時候廢除「限聚令」，支持陳凱欣議員提出嘅延展議案。不過，我亦希望政府會審時度勢，因應海內外疫情嘅最新發展，適時檢討包括「限聚令」等各項防疫抗疫措施，喺審慎原則下適切咁放寬、以至取消某啲不必要嘅限制，等香港經濟可以盡快重新啟動，減輕疫情對市民生活同生計所造成嘅影響。本人僅此陳詞。
[:]