[:zh]《追加撥款(2019-2020年度)條例草案》二讀發言[:]

[:zh]主席，我係發言支持《追加撥款(2019-2020年度)條例草案》二讀同通過。雖然大多數議員同事都會認同，呢條草案並冇爭議，但由於草案嘅名稱好容易引起市民誤會，以為政府又使凸咗，出現超支，喺錄得幾千億元財赤下，仲要尋求立法會追加撥款「填氹」。

實情並唔係咁樣嘅，草案只為咗符合法律上同會計上嘅需要，將政府喺上個財政年度、即係今年3月底之前使嘅錢，作出一個較清晰同準確嘅帳目紀錄。我今日嘅發言就係為咗講清楚有關程序同事實，以免有人混淆視聽、借題發揮，攻擊政府同支持呢條草案嘅議員。

政府喺每年2月向立法會提交嘅《撥款條例草案》，亦即財政預算案，都會將來年度各個政策局與部門嘅開支預算，一分一毫都寫得清清楚楚。不過，對於一啲需要財委會另行批准嘅開支項目，例如一年一度嘅公務員薪酬調整撥款、向不同政府基金進行注資等，政府雖然會喺預算案預留撥款，但暫時唔會列入相關嘅部門開支總目之內，直至財委會之後正式作出批准為止。

因此，喺每個財政年度完結後，政府都會透過提出《追加撥款條例草案》，修訂之前已獲立法會通過嘅部門開支總目，以符合《公共財政條例》訂明嘅法律同會計要求，以免將來查閱有關法例及部門開支帳目時，出現誤會同不一致嘅地方。有關修訂並唔涉及任何新增開支，所謂要追加嘅撥款，之前已獲得立法會同財委會批准，並且好可能經已使咗。

今日恢復二讀嘅《追加撥款(2019-2020年度)條例草案》，目的正係按照立法會同財委會早於大半年至超過一年前作出嘅批准，修正番多個政策局與部門喺上上個財政年度嘅開支總目。

主席，今次草案提出要追加嘅626億元撥款，好可能係歷年最多嘅，比去年嘅367億元增加咗七成，理由好簡單，就係因為新冠肺疫疫情。當中有近300億元係出自政務司司長辦公室，主要係首兩輪「防疫抗疫基金」嘅開支。其次追加撥款最多嘅係大學教育資助委會，主要係落實向研資局轄下嘅研究基金，一次過注資200億元嘅建議。

至於其他部門嘅追加撥款，好大部分係因應公務員喺2019年、即係上一年度嘅薪酬調整，今年2020年，政府已講咗全體公務員凍薪，與市民共渡時艱。在此我期望疫情盡快消失，經濟能盡早復甦，失業率下降，人人有工做。本人僅此陳詞。[:]