[:zh]「改革主要官員問責制」議案[:]

[:zh]主席，過幾日就係7月1號，呢日除咗係香港回歸暨特區成立二十四周年，亦係《港區國安法》實施一周年，以及中國共產黨建黨一百周年嘅大日子。喺中央支持同國安法協助下，香港喺過去一年成功止暴制亂、由亂至治，再加上人大「三一一」決定同《完善選舉制度草案》通過，為香港政制堵塞漏洞、撥亂反正，確保「一國兩制」實踐行穩致遠。

不過，香港要戰勝疫情、重見繁榮，解決由殖民時期積落嘅種種深層次問題，始終係要由特區政府去做、由香港人自己去管理好香港，唔可以成日靠中央幫手。因此，本會今日辯論由李慧琼議員提出嘅「改革主要官員問責制」議案，係相當適切同合時。

早喺2019年底，黑暴仍然肆虐之時，我喺提交畀特首嘅施政報告建議書中，已經指出香港需要「變革」。當中包括改革政府嘅管治思維同手法，更迅速有效咁，應對愈趨複雜嘅政治同經濟環境。

我提議嘅改革方向包括：提高官員嘅主動性同積極性；提升施政效率、精簡行政程序、訂立成效指標，改變過往議而不決、決而不行嘅陋習；加強跨部門、跨政策局嘅溝通協調；仲有係加強官員對國家發展同國際形勢嘅認識，加強對創新科技及新媒體嘅應用等。上述施政短板，喺黑暴及疫情初期充份顯露，尤其係部門各自為政嘅問題。

有啲人或會認為，喺國安法同新嘅選舉制度實施後，政府嘅組織架構、問責班子同公務員嘅制度就唔使再變革。其實啱啱相反，有咗穩定嘅政治同社會環境，政府更可加快步伐，「穩中求變」，回應市民嘅期望。

主席，我睇到官員嘅積極性同團隊合作，近期係有改善，做決定果斷咗，但速度同效率方面有時仍強差人意，當中最多人批評嘅，就係喺解決土地及房屋問題方面。

麥美娟議員嘅修正案，建議將現時嘅房屋、發展、運輸及環境政策範疇重組，呢個建議我過去幾年不斷有提，上屆政府亦曾經推動，可惜畀攬炒派拉布拖垮。如果有機會，我覺得政府可以再做。另一方案係增設《基本法》有訂明嘅「副司長」職位，專責覓地建屋，統籌各個政策局、部門同相關法定機構嘅土地房屋工作。

不過，就算重組咗政府架構，都唔代表香港嘅住屋問題就能加快解決，始終成事係在人。現任發展局局長黃偉綸、同運輸及房屋局局長陳帆，已經好努力同積極，但剩係兩位局長、剩係問責官員努力係唔夠嘅。就算加埋副局長同政治助理，全體政治任命官員亦只有約30人，如果有18萬人嘅公務員都唔積極，政府點都唔會做得好，亦唔會做得快。相對於主要官員問責制，我認為公務員現時嘅制度都有唔少改善空間。

國家主席習近平指出，作為管治者，必須堅定理想信念、更新智識觀念、掌握過硬本領，自覺站在國家大局上想問題、辦事情；喺公務員體系，亦要建立健全嘅激勵機制，推動形成「能者上、優者獎、庸者下、劣者汰」的正確導向。本人僅此陳詞。[:]