[:zh]「積極把握國家『十四五』規劃機遇」議案[:]

[:zh]主席，我發言係支持黃定光議員提出嘅「積極把握國家『十四五』規劃機遇，及爭取加入 《區域全面經濟伙伴關係協定》」議案。香港喺1997年回歸祖國後嘅頭十多年，政府制訂嘅規劃同發展，官員嘅思維同政策，往往予人嘅感覺係以深圳河為界，冇好好了解同配合深圳、廣東省，以至整個國家嘅規劃同發展，錯失咗好多良機。

最明顯例子係創新科技。首任特首董建華先生，好早就提出香港要大力發展創科，可惜佢上任冇耐就遇上金融風暴，並且得唔到整體社會同其他官員嘅全力配合支持。廿年之後，深圳市已發展成為全國、以至全球嘅創科重鎮，香港嘅河套區創科園仲只係做緊土地平整工程，落後咗人哋唔止二十年。

另一個例子係香港嘅城市建設及運輸基建規劃。港珠澳大橋如果可以早10年起好，對香港經濟同社會所帶嚟效益、對特區融入國家及大灣區發展起到嘅促進作用，比起依家肯定唔止大10倍。深圳河兩岸嘅土地，廿多年前兩邊都仲係相當荒涼，依家北面嘅深圳已大廈林立，南面嘅香港就同當年冇乜大分別，依舊係雜草叢生。擬建嘅新界北新發展區，連規劃研究都未做好。

我聯同建測規園界四個專業學會成立嘅「明日大嶼專業關注組」，尋晚同負責中部水域人工島規劃研究嘅顧問公司代表同政府官員開會。大家都提出，整個「明日大嶼願景」嘅規劃同建設，必須更好地、更前膽地咁配合國家同大灣區嘅未來發展。唔止係「十四五」規劃，而係「十五五」、「十六五」，甚至去到「二十五」規劃都要配合。千祈唔好重蹈複轍，剩係諗香港本身嘅發展需要，咁先能夠善用呢片得來不易嘅土地，引領香港、以至整個大灣區嘅經濟同城市發展，進入全新嘅境地。

「十四五」規劃提及香港嘅內容係歷來最多嘅，當中三大重點係支持港澳鞏固及提升競爭優勢、支持港澳更好融入國家發展大局，以及積極穩妥推進粵港澳大灣區建設。要有效落實有關建議，政府嘅政策、思維，以至架構方面，都要循相關方向作出改變。

由特首擔任主席嘅「粵港澳大灣區建設督導委員會」，已成立咗接近3年，「粵港澳大灣區發展辦公室」亦都成立咗大半年，期間做咗啲乜嘢呢？有咩具體成效同目標呢？有咗呢啲上層嘅架構同獨立嘅部門，其他公務員、其他政策局同部門，有冇好好配合，更積極、主動咁融入國家發展大局同推進大灣區建設呢？好多市民其實都感受唔到。

今日有多個政策局嘅局長同副局長嚟咗，顯示政府係重視呢個議題嘅。我希望整個特區政府，由上至下都重視，仲要切實、迅速咁推動整個社會，積極把握國家「十四五」規劃帶嚟嘅機遇。本人僅此陳詞。[:]