[:zh]《2021年僱傭(修訂)條例草案》二讀發言[:]

[:zh]主席，過往社會將打工仔分為藍領同白領，藍領一般係指從事體力勞動工作為主，白領就泛民知識型、喺寫字樓上班嘅工作，但隨着經濟及社會發展逾趨複雜化，依家好多藍領工作都要擁有一定知識，另外好多白領僱員亦走出冷氣辦公室，喺日曬雨淋嘅環境工作，好似我哋建測規園界嘅專業人士咁，不時都需要喺戶外工作。

所以，依家大家講到藍領同白領嘅分別，往往喺聯想到有薪假期嘅數目唔同：藍領大多數就放法定勞工假期，1年有12日；白領就放公眾假期，1年有17日，大家相差5日。今日恢復二讀嘅《2021年僱傭(修訂)條例草案》，目的係將法定勞工假期由12日增加至17日，與公眾假期看齊。

隨着香港社會不斷進步，經濟提升，改善勞工權益，增加法定假期，等僱員有多啲時間休息，多啲時間陪伴屋企人，我相信大部分香港市民都會支持。不過，增加法定有薪假期，無可避免係會增加企業嘅營運成本，對中小企嘅資金壓力更大。早前政府修例增加法定有薪產假，就係由公帑去補貼企業嘅大部分薪酬成本。今次建議增加勞工假，政府就冇任何額外嘅補貼，要由企業同老闆自行承擔。

因此，喺經過勞顧會討論多年之後，呢5日新嘅勞工假，將會以循序漸進嘅方式遞增，由2022年去到2030年嘅9年之內，每隔兩年增加1日假期，讓企業有時間適應有關變化，喺人手同運作上作出調整，減輕營運成本增加嘅壓力。

黃國健議員同郭偉強議員提出嘅修正案，建議加快增加法定勞工假期嘅步伐，將原定9年嘅時間，縮短至5年、甚至要喺兩年之內，去到2023年就加晒5日假期。咁做不單會影響勞資雙方有商有量、互諒、互讓同互信嘅關係，破壞已達成共識嘅決議，亦可能令部分中小企，難以應對一下子嘅大幅改變。

尤其係經歷咗前後長達兩年嘅黑暴同疫情衝擊，好多企業嘅人手同財政狀況都已非常緊絀，因此我係唔會支持有關嘅修正案。不過，我亦呼籲嗰啲有能力嘅企業，可以早過政府提交嘅條例草案規定，提前增加旗下僱員嘅有薪假期。

鍾國斌議員嘅修正案就啱啱相反，建議將增加勞工假期嘅速度減慢，押後兩年先至開始，去到2032年先至加晒總共5日假。正如剛才指出，我明白喺過去兩年嘅經濟環境，好多企業都好難捱，但隨着第四波疫情結束，本港嘅疫苗接種率逐漸提升，恢復通關同經濟復甦開始露出曙光，我認為亦唔應該推翻大家爭取咗咁多年、商討咗咁耐先得來嘅共識。反而我覺得最重要嘅係，如何盡早恢復通關，令大家生活回復正常。我認為關鍵係要全民接種，快打疫苗，因此政府要繼續努力，市民亦要積極配合，大家同共攜手，戰勝疫情。

主席，增加勞工福利，同增加其他社會福利、長者福利同醫療福利一樣，永遠都係愈多愈好，但大家必須思考、同解決「錢從何來」嘅問題。更多嘅社會福利，會唔會嚴重影響企業嘅競爭力、社會嘅生產力、以及政府財政能否長期應付呢？相關嘅福利計劃係咪可以持續，會唔會導致最後要加稅填氹呢？作為立法會議員，一定要考慮整體社會，唔能夠只單獨睇個別階層、個別業界嘅要求同利益。

喺過去，每當政府提出一啲提升勞工權益或者基層福利嘅建議，即使已通過廣泛諮詢、已取得勞資雙方、相關業界、團體嘅共識，本會總有某啲議員、某啲團體，認為唔夠多，加得唔夠快，有議員可能提出修訂，話要再加多啲、加快啲。

有關做法從某些階層、某些界別角度，亦係無可厚非，但希望大家都要尊重最終嘅結果，唔應該將問題泛政治化、造成社會分化。最緊要大家能夠齊心攜手，一同改善香港嘅經濟及就業環境，最終令到社會各個階層都受益。本人僅此陳詞，支持草案二讀同三讀，反對各項議員修正案。[:]