[:zh]《2021年海洋公園公司(修訂)條例草案》二讀發言[:]

[:zh]主席，受到黑暴、疫情，以及再之前嘅「踢篋」、「驅蝗」事件影響，訪港內地旅客大跌，導致過往以機動遊戲為賣點、過份依賴內地旅客收入嘅海洋公園，營運出現嚴重財政赤字，甚至有倒閉嘅危機，需要向立法會申請撥款救亡。政府及園方其後制訂咗一套新策略，摒棄主題公園嘅發展模式，將海洋公園重新定位為以保育同教育為主，同時結合自然、歷險與娛樂嘅休閒度假區，希望可令海洋公園重生，做到自付盈虧。

今日恢復二讀嘅《2021年海洋公園公司(修訂)條例草案》，目的正係落實上述嘅新發展策略，為公園嘅改革計劃提供法律基礎，拆牆鬆綁。

草案其中一項主要修訂，係將海洋公園公司嘅法定職能同使命，由過往嘅「康樂」及「教育」，再加上「保育」嘅字眼。對於有關修訂我係有啲憂慮嘅，因為對於何謂「保育」，唔同人可以有唔同嘅理解。有人可能認為，「保育」即係乜都唔郁得、乜都唔變得，公園內嘅嘅一草一木，以至係已經過時同老化嘅機動遊戲設施，全部都要保留，不遷不拆，咁樣先至叫做「保育」。

將「保育」兩個字寫入法例之內，變成海洋公園公司嘅法定職能，將來園方想進行任何新嘅建設、想拆卸部分舊有建築物，或者因為要配合發展而需要移植或斬幾棵樹，會唔會就有人執住呢兩隻字，走去申請司法覆核，藉此阻撓工程進行呢？事實上，過往法例並冇列明園方需要做保育工作，但實際上已做咗好多年，係咪有必要作出相關修訂呢？我希望我係過慮，但香港喺回歸後，確實係有人成日執住法例裡面嘅一兩隻字，透過司法覆核等方式，阻撓不同類型嘅發展計劃。

草案嘅另一組修訂，係明確授權海洋公園公司，可以係現有嘅公園範圍外營辦業務，甚至係走出香港都得。草案亦清晰咁訂明，園方有權將部分園區用地及設施，以長期特許經營權等不同形式，外判予私人機構進行建設同營運，藉此增加公園嘅收入，同時令相關零售、餐飲及消閒服務，更加多元化、專門化同商業化，令到園方可更為專注於教育同保育工作。

據報，園方近日已就計劃為免費入場嘅山下園區，以及仍須收費嘅兩個山上主題區，邀請有意合作營運嘅私人機構入標。事實上，海洋公園喺正港鐵車站同香港仔隧道出口側邊，加上政府推出嘅「躍動港島南」計劃，希望將港島南打造成充滿活力、魄力，同時適合工作、居住同消閒玩樂嘅地區，公園嘅未來發展，理應係大有可為嘅。

如果相關發展商及承辦商，能夠善用海洋公園嘅品牌、教育保育嘅特色，以及優美嘅自然環境，應該比一般嘅商場、食肆同娛樂設施更具優勢。但要有效發揮相關協同效應，喺商業考慮與教育保育之間取得平衡，協調好將來山上山下三個主題區，園區嘅三間酒店，以及即將開幕嘅水上樂園，避免有關設施同營運方式變到格格不入、各自為政，園方嘅管理能力就至為重要。

海洋公園公司嘅管理績效，過往備受質疑，喺立法會先後兩次批准撥款合共逾一百億元為公園救亡，以及政府借調官員出任公司嘅管理層後，市民仍未睇到好明顯嘅改善。以水上樂園為例，園方早喺今年初就安排議員入內參觀，大家都睇到各項硬件設施都已接近完成，但樂園嘅開幕日期卻一拖再拖，由最初話七月、八月可啟用，拖吓拖吓依家要九月下旬先至開幕，錯失咗學校暑假嘅黃金檔期，令人再次質疑園方嘅管理能力同政府嘅監管工作成效。

海洋公園公司嘅新任行政總裁啱啱喺上周上任，我希望新人事可以帶來新嘅作風、新嘅景象，切實提升園方嘅管理效能，加快落實各項改革建議，務求盡早達至自付盈虧，以至帶動整個南區嘅發展，而唔會變成不斷要納稅人注資「填氹」嘅公帑黑洞。

主席，早喺去年年中，政府首次向立法會申請撥款為海洋公園救亡時，我同好多建測規園界嘅專業人士，已指出單單針對公園進行改革並唔足夠，要整個港島南區去做，聯同黃竹坑工業區嘅改劃發展、香港仔市中心同海濱地區嘅活化更新，一併咁去規劃同推動，最終促成特首喺去年施政報告提出「躍動港島南」計劃。

我聯同業界嘅四個專業學會，其後成立「港島南區及海洋公園發展工作小組」，多次約見商經局、旅遊事務署同海洋公園嘅代表會面，以及喺今個月初同新成立嘅「躍動港島南」辦公室開會，就海洋公園以至整個南區嘅未來發展坦誠交流、提出意見，政府同園方亦吸納咗我哋嘅不少意見同建議。

呢種尊重專業、攜手合作嘅態度同做法，係值得稱讚同應該進一步推展嘅。我希望政府喺未來推動發展項目同計劃時，例如係「明日大嶼願景」、新界北嘅多個新發展區，以及一啲大型嘅舊區重建計劃，都可以參考呢種諮詢同合作模式，其效果同效率，可能會好過傳統嘅填點心紙、鬥大聲嘅公眾參與活動。主席，本人僅此陳詞，支持草案二讀同三讀。[:]