[:zh]「解決社會矛盾 消弭貧富差距」議案發言[:]

[:zh]主席，同全球好多國際城市一樣，香港存在頗嚴重嘅貧富差距問題。特區政府最近兩年雖然面對嚴峻財赤，但財政尚算穩健，故此有能力繼續向有需要嘅市民施以援手，協助佢哋緩解貧困壓力、改善生活。

不過，我哋同時要謹記，香港係奉行「一國兩制」嘅。《基本法》第5條訂明：「香港特別行政區不實行社會主義制度和政策，保持原有的資本主義制度和生活方式，五十年不變。」喺現行制度下，社會存在唔同階層，市民因應各自嘅能力、動力同資本差異，出現收入同財富差距，係自然嘅結果。有錢嘅人，只要佢哋係循守法、正當嘅途徑取得財富，社會應予以尊重。當然，政府嘅政策，係要給予市民公平嘅機會。

對於今日議案嘅標題，要「消弭(米)貧富差距」；「消弭」呢個詞語香港人比較少用，我理解係有徹底消除、掃除、根除嘅意思；議案內文亦提到，要「消弭勞資關係和社會階級不對等」，難免會令部分人士擔心，係咪有人想搞階級門爭、想加劇勞資對立，想香港唔再實行資本主義呢？

我同唔少社會人士都認為，香港有需要縮減貧富差距，唔係要徹底消除貧富差距；處理方法主要包括稅收、福利及公共房屋政策，唔係搞勞資對立。

用作量度貧富差距嘅堅尼系數，香港長期係處於0.53至0.54，係全球嘅頭幾位，但如果計埋各項稅收同福利嘅投入，有關數字就回落至約0.47嘅水平，反映特區政府近年大幅增加社福開支所產生嘅效果。不過，呢個數字都仲係高嘅，政府有責任繼續設法改善民生。

香港嘅另一項、我認為可能係最重要嘅扶貧措施，就係公共房屋政策。多項研究都顯示，公屋嘅扶貧效果係相當顯著同持久，尤其有助消除所謂嘅「跨代貧窮」問題，協助基層家庭嘅子女向上流動。近年社會好關注嘅劏房問題，劏房家庭需可能要花上超過一半收入嚟交租，嚴重影響佢哋嘅生活質素同子女成長，主因正係公屋供應量嚴重不足，輪候時間愈拖愈長所致。

因此，大幅、迅速咁增加香港嘅土地及房屋供應，就係最有效同最持久嘅扶貧、脫貧措施。我喺今年嘅施政報告建議書，就此提出咗多項具體建議，包括推動新界「城鎮化」、提高新界土地嘅發展密度、全面檢視香港嘅土地用途分配、檢討相關嘅法規及程序，以及加快推展各個公私營嘅建屋項目。希望政府積極採納推動，加快解決房屋供應不足嘅問題，咁樣，我相信香港嘅貧富差距就得以縮窄。本人僅此陳詞。[:]