《2021年醫生註冊(修訂)條例草案》二讀發言

主席，由我擔任主席嘅立法會工務小組委員會，本年度一共通過咗92項工程及顧問項目，涉及撥款額高達2340億元，兩者都創下歷史新高。當中屬於建築工程嘅項目，撥款額最高嘅頭幾位都係公營醫療設施，包括造價超過368億元嘅啟德新急症醫院、86億元嘅將軍澳中醫醫院，北區醫院嘅擴建剩係地基工程都要21億，嚟緊港大醫學院擴建預計又要用超過30億，前後兩期十年醫院發展計劃，總共要使超過4000億元，仲貴過港珠澳大橋、高鐵、同沙中線嘅總和。

不過，議員喺審議有關項目時，除咗關注造價、設施、設計同建造嘅時間，更關注嘅係夠唔夠醫護人手去提供服務。如果唔夠醫生、唔夠護士，再起多幾多間醫院，再加多幾多張床位都冇用，都係無助提供公營醫療服務，尤其係專科服務嘅輪候時間。香港每年都有唔少病人，尤其是係長者，等睇醫生等做手術，等到病情惡化，甚至身故都未等到。喺香港呢個文明進步、醫學發達嘅社會，呢種情況係唔應該出現嘅。

增加醫護人手，我認同最好係加強本地培訓。雖然港大同中大醫學院都做緊擴建，政府同教資會亦好樂意增加資助，但估計同樣係因為唔夠人手，冇足夠嘅專科醫生任教，而未能喺短期之內大幅增加醫科學額，形成惡性循環。

亦有人質疑香港係唔係唔夠醫生，早前疫情肆虐，好多市民有病都未必馬上去睇醫生，擔心會交叉感染，聽聞唔少私家醫生一度冇晒生意。但佢哋大多數都唔願意去公立醫院做，一來可能會搵少啲錢，二來係怕辛苦，驚會做到傻。公立醫院醫生之所以會做到傻，原因正係唔夠人手，形成第二個惡性循環。

新畢業嘅醫護人員，喺公立醫院捱完幾年，累積咗經驗，考到專科資格，往往就會跳出私人市場去搵真銀，生活又自由啲。近年唔少醫護人員被外國高薪挖角，因為全球好多國家同地區都唔夠醫護專才，推出種種計劃吸引佢哋去當地工作，甚至移民，導致大學培訓更多醫生同護士都唔夠，又係另一個惡性循環。

但其實香嘅醫生對人口比例，比起呢啲同香港搶奪醫護專才嘅國家同地區仲要低。好似廖長江議員剛才指出，香港每一千名市民，只得唔夠兩個註冊醫生，新加坡有2點幾個，英國美國有3點幾個，德國更有成接近6個。如睇埋非本地培訓醫生佔整體醫生嘅比例，相差就更加巨大，香港只有1%嘅註冊醫生係非本地培訓，大部分海外先進地區起碼有一至兩成係非本地培訓嘅醫生，有啲甚至高達四成。

事實同數字證明，要打破上述多個造成香港醫生短缺嘅惡性循環，顯著提升醫生對人口比例，除咗增加本地培訓之外，亦必須同時擴大輸入，同全球各國一齊競爭醫護人才，呢個就係今日恢復二讀嘅《2021年醫生註冊(修訂)條例草案》嘅立法背景。

主席，任何輸入外地勞工，包括輸入外地專業人才嘅建議，都總會引起本地僱員同相關專業嘅憂慮，甚至會強烈反對，因為增加咗供應同競爭，或多或少都會影響到佢哋，例如係變得冇咁吃香、唔可以再收得咁貴，對顧客、即係對病人嘅服務態度要提升等等。但作為立法會議員，包括來自功能團體嘅議員，我哋應該更關注整個社會、全港七百多萬市民嘅利益，是其是、非其非，顧大局、敢擔當，而唔係只顧自己同所屬業界嘅利益。

有人擔心輸入外地醫生，醫療質素難以保證，又未必識中文同廣東話，好難同病人溝通。今次草案雖然擴大咗輸入非本地培訓醫生嘅範圍，但同時亦保留同增設咗多重機制，去保證呢批醫生有足夠嘅醫療水平。而相對於有醫生做到死、有病人等到死，語言同溝通問題，一定係比較容易克服嘅。

回顧最近十多年，多次有關醫生專業改革嘅爭議，難免會令人覺得，上述反對輸入外地醫生嘅理由，其實只係藉口，實情係行業保護主義作怪，以至係部分人口中嘅「醫生霸權」作祟。身為專業人士，我當然尊重「專業自主」嘅原則，但專業主自、自我監管唔能夠變成「無王管」、變成行業或專業保護主義。如果專業自主嘅結果變成損害公眾利益，甚至係危害市民嘅健康同生命，有關嘅專業就唔會得到市民嘅尊重，唔值得受到法律嘅保護，政府就有責任作出干預。

大家仲記唔記得，上屆立法會亦曾經嘗試修訂《醫生註冊條例》？當時嘅目的並唔係輸入醫生，而係加強維護病人嘅權益，希望加快醫生專業失德嘅聆訊同處分程序，減少出現「醫醫相衛」嘅情況，實在諗唔到有咩理由去反對。但反對修例嘅醫生，將草案歪曲成為輸入內地醫生鋪路，煽動部分議員、市民嘅反中同反政府情緒。當時代表醫學界嘅立法會議員，聯同部分反對派議員，無所不用其極咁拉布，包括提出大量嘅修正案、不斷要求點算法定人數等，最終令草案胎死腹中。 今次修改《醫生註冊條例》，代表醫學界嘅陳沛然議員亦有提出修正案，不過就只得一項。相信佢亦唔會不斷點人數拉布，因為立法會已經修改咗《議事規則》，杜絕拉布攬炒嘅行為。作為專業界別嘅立法會議員，我深信處事嘅基本原則係應該以事論事，為市民、為香港、為國家嘅利益做事。主席，本人僅此陳詞，支持草案二讀同各項政府修正案。