謝偉銓都告急 搵資深測量師拉票

立法會選舉仲有幾日就投票，除咗直選候選人頻呼選情嚴峻，喺建築、測量、都市規劃及園境界競逐連任嘅謝偉銓（Tony）近日亦宣布「選情告急」，佢連日密密到唔同政府部門外拉票，噚日朝早就去咗差餉物業估價署所在嘅長沙灣政府合署擺街站，仲搵咗資深測量師陳顯滬同林力山幫佢做義工。

陳澤斌發電郵 籲給業界一個機會
測量師學會前會長何鉅業亦頻頻為佢拉票。Tony近日推出告急短片中，就有何鉅業等測量師為其催票，指香港要向前，就必須要有實力嘅議員服務佢哋。

至於對手陳澤斌，近日就以「給建測規園一個機會」廣發電郵催票，當中提到自己曾任助理建築署長，現時係建築師註冊管理局主席、香港城市設計學會副會長，佢話自己參選，係因為業界缺乏一個認真聆聽及解決困難嘅代表，佢希望為業界尋求突破，帶來改變嘅機會和希望，又話雖然自己無豐富選舉經驗，亦無強大競選團隊同資源，但相信獲業界支持同信任就可創造奇蹟。

陳澤斌嘅政綱提到，要化解社會深層次矛盾、讓年輕人重拾希望；創造公平及可持續嘅規劃、土地及房地產政策等。

####
建測規園界候選人謝偉銓（左）連日去唔同政府部門外拉票，噚日就有建測規園界選委、測量師林力山（右）同佢一齊派單張。
（謝偉銓facebook圖片）