《2022年撥款條例草案》(2022-23年度財政預算案)二讀發言

主席，我發言係支持《2022年撥款條例草案》，亦即2022-23年度財政預算案嘅二讀。記得去年底財爺就預算案諮詢時，香港連續多個月本地清零，經濟強勁復甦，失業率回落，與內地通關在望。但隨住第五波疫情喺今年初爆發，香港經濟迅速逆轉，預算案多項措施亦作出調整，包括再次向防疫抗疫基金注資、預留數百億元作醫療及疫苗開支、推出第二輪保就業計劃等等。

幸好，喺中央大力支持同市民齊心努力下，單日確診人數現已大幅下降，各類經濟活動開始漸漸恢復。但政府同社會都不應掉以輕心，除咗要致力重振經濟，加快發展外，亦要為疫情常態化未雨綢繆，做好準備。

正如我喺預算案公布當日指出，今份預算案整體係做到「兼顧疫情振經濟、團結同心渡難關」，就抗擊疫情、紓解民困、振興經濟同投資未來四個方向，提出咗多項具體政策同財務措施，回應同吸納咗唔少業界提出嘅訴求同建議，有助團結社會，同心抗疫。

預算案接納咗我倡議多年嘅「住宅租金開支免稅額」建議，有助減輕部分中產及專業人士嘅稅務負擔，減低過往稅務寬免只注重置業方面。另外，我同業界提出嘅其他多項紓困及稅務建議，包括再次派發電子消費券、繼續寬減薪俸稅、利得稅同差餉、提供電費及交通補貼、以「能者多付」原則改革差餉制度等，亦獲得財爺採納。

喺土地房屋同城市建設方面，預算案提出「基建融資證券化先導計劃」、為「北部都會區」發展預留1000億元專用款項、探討透過發債及公私營合作等模式推展「明日大嶼」計劃，以確保香港有足夠財力繼續推展相關項目。透過投資基建嚟刺激經濟，創造就業，呢點係相當重要嘅，疫情嘅影響可能歷時三數年，但相關基建工程同發展計劃，係講緊十年、二十年、甚或更長時間嘅事，對香港長遠發展至為重要，唔應該因為一時嘅經濟不景而拖慢、甚至擱置。

不過，要真正有效、快速咁增加土地及房屋供應，達至穩定樓價、三年上樓、同告別劏房等政策目標，剩係有錢並唔足夠，政府必須切實咁精簡與發展相關嘅法規及審批流程，有效、高效地達標。喺早前嘅財委會特別會議，我同多位議員都批評政府嘅多項措施與發展計劃，好似係「講咗就等如做咗」；往往錢就使咗、位又加咗，但市民遲遲睇唔到成果。

例如我一直關注嘅公營房屋興建進度、善用過剩公務員宿舍及相關用地、發展青年宿舍同社福設施，仲有係最近向立法會申請撥款嘅元朗南發展計劃、粉嶺公屋項目、灣仔三幢政府大樓嘅重置工作，短則延誤四、五年，長嘅就拖足十幾廿年都未完成，效率奇低，令政府做咗土地大嘥鬼。與此同時，公屋輪候時間不斷延長，劏房數目持續上升，政府民望自然不斷尋底。

除咗加快達標之外，香港亦要切實咁提升競爭力。當中最需要追落後嘅，就係人才培訓同推動創科。今份預算案就人才培訓提出咗唔少建議，包括向「建造業議會」撥款10億元加強培訓技術人員、擴展「主要項目精英學院」嘅培訓對象、提高「持續進修基金」嘅資助上限等。但係對於我同業界要求嘅增加建測規園大學學額，則未見積極回應，令人擔心未來香港係咪有足夠嘅專業人才，妥善地推展各項大型發展計劃。

培訓新嘅人才同吸引外來人才重要，想辦法保留現有嘅本地專才亦相當迫切，關鍵之一係改革政府同公營機構嘅採購招標制度。包括進一步降低「價低者得」比重，避免「割喉式落標」，讓專業人士有合理嘅費用同發展前景，以及減省一啲不具效率嘅監管程序同要求。要引入「本地優先」元素，支持中小型同初創企業發展。我將於下月嘅立法會大會就此提出議員議案，希望得到議員同事嘅支持，以及政府嘅切實同詳細回應。

喺創科研發及應用方面，預算案提出向「建造業創新及科技基金」注資12億元同擴大資助範圍、預留3000萬元推動嶄新物料及建造技術、提供樓面豁免誘因以鼓勵「組裝合成」建築法等，都係值得支持。然而，預算案建議用6億元進行全面嘅「電子政府審計」，需時3年才能完成，就令人憂慮當局喺落實「智慧政府」同提升施政績效方面，會否一如既往咁「歎慢板」。

此外，受到疫後嘅全球經濟復甦，以及俄烏戰事嘅影響，多個國家同地區都面對惡性通脹。預算案預計香港嘅通脹水平尚算溫和，某程度係受惠於本地嘅樓價同租金回落，但對於一般基層市民、尤其係公屋居民嚟講，就真係感到「通脹猛於虎」。推出電子消費券可幫到佢哋一時嘅開支，但亦可能加劇物價升幅，而且類似嘅派糖措施不可能長遠、持續咁推行。

港府喺上個財政年度轉虧為盈，其實係個假象，正如財爺多次指出，扣除發行債券同各項基金回撥，庫房實際上仍錄得數百億元赤字，因此任何短、中、長期嘅紓困同社福措施，都要考慮「錢從何來」。要長遠維持政府收入，改善市民生活，始終要靠推動香港經濟同城市發展。

預算案提出「以民眾為發展中心」嘅理念，強調要豐富香港嘅產業結構，邁向高質量而且具包容性嘅經濟增長，從而創造更多優質、多元嘅就業機會，協助市民自力更生，共贏共富，方向絕對正確。無論下屆政府嘅財政司司長係邊一位，都應該努力循住呢個方向去實踐。主席，本人謹此陳詞。